Acordies la Coordinadora Ecoloxista d’Asturies, “Xixón, cola contaminación que tien, nun pue permitise que se balten más árboles”
Esixen que se sancione al responsable de baltar 13 árboles na Escuela d’Idiomes de Xixón, sita na Cai Puertu Vegarada. Los mesmos atopábense nel xardín d’un centru educativu públicu que depende del Principáu d’Asturies, gociaben de bona salú y nun suponíen dengún riesgu pa los escolinos nin pal personal del centru, polo que dende la CEA solicitaron a dambes alministraciones que s’investigue quién los mandó baltar y los informes que lo permitieron.
Dende la Coordinadora Ecoloxista recuerden que los árboles mauros desempeñen un papel importante xenerando solombra y un aumentu de la biodiversidá urbana, apurriendo a plantes y animales un hábitat, alimentos y protección favorables.
Amás de dar solombra, amenorgando l’efectu “islla de calor” al esfrecer la redolada ente 2 y 8 graos (respectu al calor xeneráu pol asfaltu y otros materiales), un árbol mauru pue absorber hasta 150 kg de CO2 per añu -cuasi 2.000 kg en total, considerando que son trelce los árboles baltaos-, desempeñando un papel importante na mitigación del cambéu climáticu. Especialmente en ciudaes con altos niveles de contaminación como ye Xixón, los árboles ameyoren la calidá del aire, faciendo que les zones urbanes seyan más saludables pa vivir. Los árboles grandes son escelentes filtros pa contaminantes urbanos y partícules fines. Absuerben los gases contaminantes (como’l monósidu de carbonu, los ósidos de nitróxenu, l’ozonu y los ósidos sulfurosos) y peneren partícules fines como’l polvu, la suciedá o’l fumu del aire atrapándolos nes fueyes y la corteza.
Por tollo, reclamen que se sancione estes baltes y se repongan darréu los árboles sumíos.
Susana Sela
This work is licensed under a Creative Commons Attribution 4.0 International License.