La Secretaría de la Muyer de SUATEA presenta la ventiavo primer edición del calendariu coeducativu Tiempu de Muyeres, Muyeres nel tiempu, dedicáu nesta ocasión a les muyeres nel teatru
Dende la Organización de Muyeres de la Confederación Intersindical lleven venti años ellaborando un calendariu feminista y coeducativu, col que visibilicen les aportaciones de les muyeres a la sociedá. Ca añu dedícase a la presencia de la muyer nun ámbetu, correspondiendo’l 2025 al teatru.
Les páxines d’esti calendariu contienen efemérides alusives a actrices, directores, escenógrafes, monologuistes, diseñadores de lluces, personaxes, etc, y tamién feches señalaes nes lluches feministes. Como recursu didácticu que ye, a la fin del calendariu hai una propuesta d’actividaes pa tolos niveles educativos, dende educación infantil a educación d’adultos, pa ca un de los meses del añu.
L’actu de presentación del calendariu, va tener llugar el próximu llunes, 27 de xineru, a les 17:00 hores, na Escuela Cimera d’Arte dramáticu, en La Llaboral Ciudá de la Cultura, en Xixón.
Nel mesmu cuntaráse cola presencia de dos actrices asturianes que van falar de los retos actuales de les muyeres nel oficiu y del teatru como recursu didácticu nes aules; son María Cotiello, actriz, presentadora y docente; y Verónica Gutiérrez, actriz y fundadora de la compañía É Vero Teatru. Va agasayase con un exemplar del calendariu a tolos asistentes.
Verónica Gutiérrez lleva más de 20 años d’oficiu trabayando en gran variedá d’ámbetos de les artes escéniques: musical, cabaré, zarzuela, teatru clásicu y contemporaneu, danza, teatru de cai, teatru infantil, performance, monólogos, presentaciones… Desenvolvió la mayor parte de la so carrera sobro les tables con numberoses compañíes de teatru ente les que destaca Teatru Marxe. Tamién trabayó en televisión, doblaxe, radio y publicidá. Ye llicenciada n’Hestoria y Ciencies de la Música y diplomada en Maxisteriu. Estudió Arte Dramático n’Ensayu 100: escuela del actor, en Madrid.
Nel 2016 creó É Vero Teatru, y arriendes de l’actividá cola so Compañía desendolcó variedá d’espectáculos d’autoría propia, como por casu: Catacróquen, Esa Escura Conceyala, La bisarma Revoltixu, los espectáculos de cai La Güestia y El pleitu de les tolines. Apocayá fixo un homenaxe a los horros cola obra Alrodiu l´horru. En 2021 otorgase-y el premiu a meyor actriz protagonista nel festival de teatru profesional de Málaga de Frigiliana.
María Cotiello ye llicenciada n’arte dramáticu pola RESAD de Madrid y graduada en llingua y lliteratura española na especialidá de Llingua asturiana.
Los sos entamos como actriz aficionada, son en Mieres coles compañíes Polimnia y Capitol teatru. Yá de forma profesional trabayó n’obres como “Preses”, “Don Xuan asimétricu” o “El delincuente honráu” ente otres.
Amás, realizó trabayos en cine y televisión: en series como Ensin mieu a suañar, Amar en tiempos revueltos, El ministeriu del tiempu, La República o So barruntu. Y en la película Les 13 roses, ente otres. Foi presentadora na TPA de los programes “De Cai” y “La Reválida”.
La so otra faceta ye la de docente en llingua asturiana. Anguañu trabaya na Escuela d’Adultos del Fontán, n’Uviéu, impartiendo Llingua asturiana a los cursos de la ESO y llingua castellana nel programa de Competencies Clave.
Susana Sela
This work is licensed under a Creative Commons Attribution 4.0 International License.