L’Asociación de Traductores Profesionales n’Asturianu, Verbéu reclama nun comunicáu la revisión de les condiciones de la llicitación pola que RTPA quier contratar un serviciu de torna del castellanu al asturianu ya eonaviegu pa los titulares d’un de los pases de los informativos diarios

Una empresa intermediaria contactó va pocu con un miembru de Verbéu pa plantega-y la posibilidá de facese cargu del serviciu de torna, comunicando-y les tarifes previstes por RTPA pa esti serviciu, tarifes que dende Verbéu consideren “irrisories, qu’atenten contra la profesionalidá y demuestren un gran conocimientu de la profesión, a la que perxudiquen gravemente, mesmo qu’a los que se dediquen a ella”.

Tres de conocer el presupuestu previstu pola cadena, Verbéu unvió como asociación a la Dirección d’informativos y esportes de la RTPA una quexa per escrito esponiendo la situación y desplicando la falta de xacíu de les condiciones de llicitación; pel momentu nun recibieron rempuesta dala per parte del organismu, polo que dende Verbéu llanzaron de forma pública un comunicáu nel que piden que se modifiquen les condiciones de la llicitación ya que, aporfien, “ye intolerable qu’un serviciu públicu comu ye la RTPA pretenda qu’otros profesionales trabayen ensin cobrar unes tarifes dignes” situación que según l’asociación de traductores anula cualisquier garantía de profesionalidá y poro de calidá del serviciu.

Susana Sela

This work is licensed under a Creative Commons Attribution 4.0 International License.