Per trixésimu segundu añu consecutivu, la Coordinadora Ecoloxista d’Asturies fai entrega simbólica de la Bullada de Purpurina, “galardón” que reconoz el llabor y acciones de les empreses, instituciones y alministraciones que más destacaron nel so llabor en contra del caltenimientu de la naturaleza y el mediu ambiente asturianu
Esti añu, tres un refechu analís de los méritos consiguíos pa ganar el premiu, nominaron: a HUNOSA, a Marcelino Marcos Líndez conseyeru de Mediu Rural, a ARCELOR MITTAL, a la Demarcación de Carretera y a Nieves Roqueñí la Conseyera de Transición Ecolóxica.
Ente personaxes de tantu desmeritu nun tuvo de ser fácil decidir, pero finalmente otórgase’l premiu a la señora Nieves Roqueñí, Conseyera de Transición Ecolóxica, Industria y Desendolcu Económicu d’Asturies, “polos sos munchos méritos na so desastrosa xestión dientro de les sos competencies”.
Tocantes a xestión de residuos, Asturies tien de los piores datos de reciclaxe nel estáu y enriba empéñase en quemar borrafes en forma de CSR na térmica de la Pereda y na cementera d’Aboño, aumentando la contaminación del aire que yá carecemos. “Nun ye nin siquier capaz de que nun se-y quemen les plantes de tratamientu de borrafes, nueves y vieyes, en Cogersa”, apuntaron los xuraos.
Acúsase-y amás de nun escuchar a los vecinos afectaos polos proyectu mineros, nun atender a los pidimientos vecinales, ignorar a la xente de la redolada de la mina d’oru de Belmonte que se funde y los pidimientos de los Conceyos de paralizar los sondeos de Peñamayor y de los valles de Siero y Xixón, afectaos poles munches irregularidaes de Minersa qu’ella permite.
Tamién sigue ensin avanzar na meyora de la calidá d’aire d’Asturies.” La única midida qu’adopta ye camudar d’allugamientu les estaciones qu’ufierten peores datos, a zones más escondíes, y sigue ensin regular les llendes almitíes del canceríxenu bencenu”.
Resalten la so xestión desastrosa de les agües residuales, con miles d’asturianos ensin tratamientu d’agües contaminaes, qu’acaben nos nuesos ríos y nel mar.
La Coordinadora Ecoloxista fai entrega de la Bullada de Purpurina 2024 a una política de quien dependen munches de les decisiones que van marcar el futuru de la nuesa rexón. “Cada pasu que se recula na defensa medioambiental y ca mala decisión que se toma compromete’l futuru d’esti mundu, a les persones que la habitamos y a les xeneraciones futures que van heredar el problema más descomanáu qu’hubiera nunca. Bonalmente, nada d’esto paeznos graciosu. Yá que llegue un añu nel que nun tengamos qu’apurrir el nuesu galardón”.
Nel Dos Santos
This work is licensed under a Creative Commons Attribution 4.0 International License.
