La organización nun quier que quede nel escaezu qu’Israel continúa col xenocidiu puestu en marcha en Palestina. “Parar esta masacre nun ye sólo una cuestión militar, sinón que tien tamién implicaciones polítiques, económiques y, desgraciadamente, humanitaries”.
Les consecuencies humanitaries, remarquen nel aniciu la so campaña, son inimaxinables: más de 45.000 persones asesinaes, de les cuales, más de la metada yeren menores, neñes y neños, y millones de palestines y palestinos refuxaos ensin los mínimos necesarios pa sobrevivir.
Les implicaciones polítiques tán nidies: apunten comu corresponsables non solo a los gobiernos aliaos d’Israel, como Estaos Xuníos; “tamién el Gobiernu español y la Unión Europea son cómplices del xenocidiu palestín mientres sigan considerando como amigu al Gobiernu israelín y comerciando, incluso con armes y municiones, con un país que comete crímenes de guerra y xenocidiu”.
Pero Asturies Insumisa quier, asina mesmo, asoleyar les implicaciones económiques d’aquelles empreses y grupos d’empreses que continúen collaborando col Estáu israelín y son cómplices imprescindibles del xenocidiu palestín: Carrefour, Zara, Coca-Cola, Nestlé, McDonald, etc.
Poro, Asturies Insumisa anicia la campaña “Non, gracies” de señalamientu d’aquelles empreses y marques comerciales que collaboren col Estáu israelín, convidando a les asturianes y asturianos a non mercar aquellos productos que diches empreses y marques ponen a la venta nos comercios y grandes superficies qu’esisten n’Asturies o en cualesquier otru llugar.
Les llistes de productos oxetu del boicó pueden atopase, por exemplu, nes redes sociales del movimientu BDS o na aplicación “No thanks”.
Nel Dos Santos
This work is licensed under a Creative Commons Attribution 4.0 International License.
