L’asturfobia nun va aparar -polo menos- fasta que se reconoza la Oficialidá y se faigan cumplir les lleisde respetu a los drechos de los asturfalantes
Iniciativa pol Asturianu sollerta de nueves torgues nel usu de la toponimia oficial nel DNI. L’asociación ta acabante de recibir la quexa d’un ciudadanu qu’acudió con cita previa a la comisaría de la Policía Nacional de La Pola Siero’l pasáu 27 de payares pa faer un duplicáu del Documentu Nacional d’Identidá. Una vegada en dependencies policiales solicita la modificación del topónimu d’Uviéu, treslladando que la pareya del ciudadanu yá cuenta con esa forma nel so DNI y que, polo tanto, ye posible. A partir d’esti momentu, niéguense a faer el cambéu poniendo toles trabes posibles. Amás d’ello, la persona que taba faciendo’l trámite de la duplicación comentó riéndose que “suena mal Uviéu. Pero, ¿en serio?”. Por esti motivu, el duplicáu del carné faise col topónimu ‘Oviedo’ en contra de la voluntá del ciudadanu.
L’afectáu llamó a posteriori a la citada comisaría pa entrugar el motivu de la negación de la modificación de la toponimia nel duplicáu del DNI ensin obtener rempuesta y cortando hasta en tres ocasiones la llamada. Nel primer intentu nun se contestó. Na segunda llamada directamente recibe una mala contestación argumentando que “no es posible y que si quiere que vaya usted a otra oficina”. Na cabera llamada, la persona qu’atendía al teléfonu dixo de manera insultante que “no es posible hacerlo, que no da opción a hacerlo. Busque usted una partida de nacimiento y vaya a otra oficina”.
Por mor d’esta discriminación, Iniciativa pol Asturianu fizo llegar a la Delegación del Gobiernu n’Asturies un escritu desplicando esta discriminación. Nel documentu, la organización reclama una disculpa col ciudadanu afectáu y la reposición del so carné d’identidá col topónimu tradicional. El colectivu en defensa del idioma tamién demanda nel rexistru un usu y presencia normal de la toponimia oficial de los diferentes conceyos nos documentos sin que’l so pidimientu suponga un problema o perxuiciu pa les persones qu’asina lo soliciten.
Asinamesmo, la entidá solicita al departamentu d’Adriana Lastra l’actualización de les bases de datos pal emplegu de los nomes oficiales, garantizando d’esta manera el cumplimientu y respetu a la llexislación autonómica. Nesi sen, la organización recuerda qu’anovar les bases de datos p’automatizar l’usu de los nomes tradicionales y qu’éstos apaezan na aplicación informática de forma automática ye imprescindible pa nun depender del recordatoriu del ciudadanu como asocede agora.
L’asociación de reivindicación llingüística pidió tamién al muérganu responsable de les Fuercies y Cuerpos de Seguridá del Estáu n’Asturies avanzar na normalización del asturianu apostando pola inclusión del idioma nel DNI pa que vaya redactáu en billingüe (asturianu/castellán). Esta ye una reivindicación que dellos ciudadanos ficieron yá nes comisaríes d’Asturies y que sigue ensin respuesta. Nel casu d’otres comunidaes autónomes, como Galicia, Euskadi y Baleares, tamién hebo una recuperación de la so toponimia hestórica. Sicasí, les sos formes tradicionales sí que son respetaes y emplegaes pol conxuntu de les alministraciones públiques del Estáu.
El colectivu plantega amás a la Delegación del Gobiernu que recuerde a les comisaríes y al so personal la importancia del cumplimientu de la toponimia oficial d’alcuerdu a lo que recueye l’ordenamientu xurídicu no tocante a esta cuestión. Iniciativa pol Asturianu espresa’l so sofitu al afectáu ante esta situación d’indefensión y reconoz el so compromisu llingüísticu y solicita una intervención clara de la Delegación del Gobiernu.
Susana Sela
This work is licensed under a Creative Commons Attribution 4.0 International License.
