Na llucha contra la especie exótica invasora aviespa asiática (Vespa velutina), tán llevándose a cabu una serie de práctiques illegales que  ponen en peligru al restu de la fauna y al conxuntu del ecosistema.

“Nun pueden permitise les males práctiques siguíes que ponen en riesgu la caltenibilidá de la redolada dañando seriamente a insectos polinizadores y a munchos otros animales” C.E.A.

L’usu illegal y desafranao d’insecticides neonicotinoides y fenilpirazoles pa acabar cola velutina ye lletal non solo para l’aviespa asiática sinón para munches especies d’insectos polinizadores, suponiendo  un grave peligru pal restu de la fauna, especialmente pa les aves que s’alimenten de los insectos contaminaos, col consiguiente impactu que supon na cadena trófica.

Les evidencies científiques apunten amás a lo inutil del entrampiau masivu non selectivu, ya que les trampes prinden más biomasa d’insectos de la que se calcula que peracaben les mesmes colonies d’aviespa asiática. Amás, según los espertos en dengún casu producen variaciones na dinámica poblacional de la especie invasora.

Poro dende la Coordinadora Ecoloxista d’Asturies soliciten a la Conseyería de Mediu Rural y Polítiques Agraries que se detenga de manera inmediata l’usu d’insecticides ensin autorizar y que tol personal dedicáu a la neutralización retirada d’aviesperos cumpla cola normativa en capacitación profesional, pero sobremanera la ellaboración d’un plan de control y siguimientu basáu na evidencia científica, col asesoramientu de personal investigador y non de personal ensin formación, como denuncien qu’asocede anguañu.

“Entendemos que se ta esbardiando dineru público n’incumplimientos de llei, dineru que podría invertise n’investigación p’ameyorar la conocencia de Vespa velutina y poder asina ameyorar la metodoloxía na llucha contra esta especie invasora, desenvolviendo productos más respetuosos col mediu ambiente” declararon.

Susana Sela

This work is licensed under a Creative Commons Attribution 4.0 International License.