El concursu de sidre más antiguu d’Asturies premia al llagar xixonés de Menéndez reconociendo la calidá de la so sidre Val d’Ornón
D’alcuerdu al xuráu, compuestu por Joaquín Fernández, Gumersindo Martínez, Juan Pérez Miyar, Mariano Villoria y Victor Fernández, la meyor de les 38 presentaes al concursu de Villaviciosa, ye la ellaborada nel xixonés llagar de Menéndez, Sidra Val d’Ornón. En segundu puestu alcontramos la Sidra de Selección Foncueva, fecha en Sariegu, y finalmente el llagar de Trabanco llevó el tercer premiu gracies a la so marca Camín.
A esta conclusión llegaron tres d’un llargu procesu, qu’entamó con un analís químicu de les amueses de les sidres presentaes, p’asegurase de que “cumplíen los criterios mínimos pa pasar a la final según lo que marca la llexislación vixente en calidá pa la sidra natural” y una primer fase na que s’escoyeron les siete sidres pasaríen a la gran final.
Por fin ayeri, na Plaza’l Güevu, una tastia ciega pública determinó los tres ganadores. En cuartu puestu hebio un triple empate, lo que dexa bien nidio la uniformidá de criterios y la altísima calidá de les sidres presentaes.
Depués de les deliberaciones del xuráu tuvo llugar un emotivu homenaxe al maliayés Laudelino Riva, siempre comprometíu colos concursos sidreros de la Villa y d’otros conceyos, fináu va unos meses. Los sos hermanos recoyeron una placa de reconocencia pol so llabor.
Alberto Rodríguez
This work is licensed under a Creative Commons Attribution 4.0 International License.
