El tráxicu accidente n’El Musel, con dos víctimes mortales y mancaos graves, alza a -siquier- diez la cifra de trabayadores finaos nel desempeñu del so llabor n ‘Asturies no que va d’añu.
En primer llugar queremos treslladar el nuesu más sentíu pésame y la nuesa solidaridá a les families y compañeros de les persones afectaes por esti accidente.
La selmana entamaba con una manifestación contra la siniestralidá llaboral convocada por CCOO en señal de duelu, refuga y denuncia pol trabayador del sector forestal fináu’l pasáu miércoles, 28 d’agostu.
Pocu podía pensase entós que la murnia cifra, hasta entós d’ocho trabayadores -cuasi un al mes- diba medrar entá en malpenes una selmana con estos dos operarios que perdíen ayeri la so vida pola caida de dos grues mientres unes maniobres n’El Musel.
Son munches les voces que yá s’alzaron reclamando l’apertura darréu d’una investigación a fondu pa determinar les causes d’esti llaceriosu accidente, non solo por que nun se repita, sinón pa esclariar responsabilidaes.
Alberto Rodríguez
This work is licensed under a Creative Commons Attribution 4.0 International License.
