El paru de llarga duración medró un 224,1% dende 2008 y el de bien llarga duración un 229,8% 

Acordies los datos llograos pol gabinete técnicu de la Encuesta de Población Activa (EPA), Asturies ye’l territoriu del estáu con mayor pesu del paru de llarga duración, con 28.200 persones, más de la metá (52,7% del total)  de los asturianos en paru con más d’un añu buscando ensin ésitu emplego. Tamién encabeza’l llistáu de paraos de bien llarga duración, esto ye, que lleven más de dos años buscando en baldre un puestu de trabayu. Nesta situación atópense na mesnos que 18.800 asturianos, el 35,1% de los paraos d’Asturies.

Estes cifres impliquen un importante xorrecimientu dende entamos d’añu, siendo 6.100 más en llarga duración y 5.500 más en situación de bien llarga duración. Dende’l 2008 son cuasi 20.000 persones más les que llegaron a vese na situación de pasar un añu buscando trabayu y 13.100 les que lleven dos o más años asina, un aumentu del 224,1% y el 229,8% respectivamente.

Esto implica unes tases d’empléu de llarga y bien llarga duración alarmantes, con dolce y diez puntos perriba la media l’estáu, respectivamente. Con ello cae tamién la tasa de cobertura —el porcentaxe de desemplegaos que recibe dalgún tipu de prestación—.

Esti tipu de paru xenera situaciones de les que ye bien difícil salir, una y bones la mayoría de los paraos de llarga duración son persones de más de 50 años que perdieron el so anterior trabayu, de complicada reincorporación al mundu llaboral, o mui nuevos, ensin esperiencia dalguna. Amás, tres estos llargos periodos ensin trabayu les condiciones psicolóxiques y económiques d’estos paraos vense duramente perxudicaes, faciéndo-yos más difícil la reincorporación a la redolada llaboral. 

Llucía F. Marqués

This work is licensed under a Creative Commons Attribution 4.0 International License.