El próximu sábadu 8 d’agostu cellébrase’n Llanera la puya de diez reses escoyíes de la más alta calidá

A la puya de reses de Llanera va namás lo meyor de la ganadería asturiana. Nun se trata d’una gran feria, sinón d’una na que cada animal foi escoyíu con pricuru poles sos escepcionales característiques.

Na puya d’esti añu, salen a concursu 10 exemplares de vacunu, 5 d’ellos con destín carne, que son el mayor atractivu pa la hostelería, cuntando quien la consigan col reclamu de tener una carne d’una calidá abegoso de superar, tendiendo a escoyese animales con gran infiltración y cebu natural, sobremanera procedentes d’esplotaciones de Llanera y la so periferia.

Los otros 5 son animales de vida, una vaca asturiana con una xata de 5 meses, una nuviella xestante tipu culón, dos nuviellos y un xatu culón, toos ellos de la meyor xenética de la cabana asturiana. Toos ellos van portar certificaos sanitarios colos paneles de pruebes diagnóstico más desixentes a nivel internacional.

Con esti sistema ponse en valor el vacunu asturianu, reconociéndose la so calidá y pagándose por ello los precios que merecen, coles mesmes que se valora tamién frente al consumidor final, que yá reconoz la calidá de les reses de Llanera, buscando na hostelería aquelles que vienen de la puya. Poro, prevése gran presencia de restoranes y empreses cárnicas a la puya, amuesa de la relevancia qu’esta tien pal sector ganaderu y hosteleru.

La res que mayor preciu algamó l’añu pasáu foi Modelo, una xata de 23 meses pola que se pagaron 3.500 euros. 

Susana Sela