La fusión de les ocho áries de la Sanidá Pública Asturiana en namás trés, con cabeceres n’Uviéu, Xixón y Avilés, cientraliza la xestión sanitaria de toa Asturies en tres ciudaes con una distancia de non más de 33 km pente elles.
El proyectu de decretu de revisión del mapa sanitariu d’Asturies, tres 18 años d’alderique sobre’l cambéu de fronteres de la rede pública de salú va ser presentáu güei xueves al Conseyu de Salú, organismu del que formen parte entidaes del sector sanitariu y otres instituciones. A partir d’ende, va sometese a información pública nel que s’abrirá un periodu d’allegamientos, esperándose qu’ente a valir el primer trimestre de 2025.
El mapa sanitariu vixente dende 1948 costa d’ocho áries de salú con cabeceres en Xarrio (Coaña), Cangas, Avilés, Uviéu, Xixón, Les Arriondes, Mieres y Riañu (Llangréu). D’equí p’arriba, estes ocho van quedar amenorgaes a trés, arrexuntando’l Noroccidente cola ária d’Avilés; el Suroccidente y el valle del Caudal con Uviéu y los conceyos del centru y la cuenca’l Nalón y l’Oriente van xunise a Xixón.
En teoría l’oxetivu final d’esti encadarmamientu ye, según Salú, “l’ampliación de la cartera de servicios en caúna de les áries”, pero cientralizaes en grandes ciodaes esta ampliación por ária nun garantiza qu’esa cartera apurra a les esnales d’Asturies.
Ello ye que esta reorganización nun enfrenta comu solucionar el problema de les 19 especialidaes méliques que sufren déficit de profesionales nos hospitales y centros de salú d’Asturies. Trés d’elles son comunes a les ocho áries sanitaries actuales: melecina de familia, dermatoloxía y mélicu d’almisión y documentación clínica. A esti elencu de disciplines hai que suma-yos les enfermeres de quirófanu y de diálisis, que tamién arralecen en tol territoriu.
Sicasí, los trés hostpitales de les esnales, Xarrio (Coaña) y Cangas, apinen los mayores déficits d’especialistes, en ca un d’ellos atrópense hasta 14 especialidaes méliques de mala cobertoria; nel hospital de Les Arriondes, son diez les especialidaes con dificultaes pa topar mélicos. Cuando tean centralizaes, van poder dicir ensin mentir que “les trés áries cunten con tolos especialistes” ensin necesidá d’especificar que toos ellos tán nes trés cabeceres, a una distancia de non más de 33 km.
Llucía F. Marqués
This work is licensed under a Creative Commons Attribution 4.0 International License.
