Presentación en Xixón de la candidatura d’Agora Repúbliques

7 Xunu, 2024

“Hai que centrase nesti momentu y agora mesmo, Agora Repúbliques ye la única manera real que tenemos de defender Asturies n’Europay hai que tener mui claro que si nun lo facemos nosotros, nun lo va facer nadie, y el llugar que, como asturianos, nun ocupemos, van ocupalo partios españoles pa los que nun emportamos”

Llucía Fernández

“Decimos los que facemos y facemos lo que decimos, somos de palabra, y nesta campaña tamos diciendo que llevaremos la voz de los pueblos que conformen l’estau pa de defender los drechos y llevar les revindicaciones que tenemos como naciones”

Jon Iñarritu

Agora Repúbliques presentó ayeri la so candidatura en Xixón nuna duple intervención de Llucía Fernández, d’Andecha Astur, y Jon Iñarritu, diputáu d’ehBildu. Nel actu espusiéronse les llinies xenerales d’actuación d’esta coallición de la que forma parte Andecha Astur xuntu con otres organizaciones soberanistes del estáu, presentando Agora Repúbliques comu la manera de defender n’Europa una posición a favor de los avances sociales, de los drechos humanos, de la clas trabayadora y de la paz, feminista, ecoloxista y antimilitarista, una opción pa enfrentase al austericidiu, el gastu militar y l’avance de la estrema drecha, recalcando la importancia de participar nestes elleiciones europees con un votu d’izquierda y soberanista que permita la representación y la defensa de los intereses de los asturianos y de toles nacionalidaes ensiertaes nel estáu español.

Llucía Fernández fexo un llamáu a la movilización de los asturianos soberanistes, los que prioricen a Asturies perriba de los intereses centraliegos, que según les encuestes, puntualizó, son munchos m´s de lo que dexen albidrar los resultaos elleutorales, p’asegurar qu’Asturies tenga voz n’Europa “Nesti momentu, Agora Repúbliques ye la única manera real que tenemos de defender Asturies n’Europa. Agora Repúbliques representa a los pueblos que refuguen el centralismu que los pon per detrás de los intereses d’una España que los ignora nel meyor de los casos, cuando non los maltrata”, declaró, remembrando que gracies a esta coalición Andecha Astur llevó ya al Parllamentu Européu temes tan importantes comu los fraudes d’El Musel y de los fondos mineros, la represión llingüística, la desindustrialización d’Asturies o l’escesu de contaminación ambiental, asina comu dellos conflictos llaborales, comu los d’Arcelor y EBHI.

Na so intervención Jon Iñarritu recalcó la importancia de votar esti domingu y la influencia de les decisiones que se tomen n’Europa sobre la vida de toos “Más del 60% de la llexisllación que s’aplica a la ciudadanianos estaos miembros de la Xunión Europea tien comu orixen la Xunión Europea. Votar importa”, Nesi sen Llucía Fernández, d’Andecha Astur, recalcó que “el llugar que, como asturianos, nun ocupemos, van ocupalo partios españoles pa los que nun emportamos. Asina qu’agora toca movilizar a la Asturies soberanista. Porque si nosotres nun votamos, podeis tar ciertos que los partios españoles, la drecha española, sobre tou, si va dir a votar. Y van facenos la vida imposible”.

Otru tema qu’ocupó bona parte del alderique foi la situación internacional, lo qu’Iñarritu definió como “nivel de peligrosidá mundial”, aludiendo a la cantidá y a la gravedá de los conflictos activos nesti momentu y reclamando una actuación de la Xunión Europea acorde colos principios de paz colos que fue fundada, mui llonxanos de les sos llinies actuales d’actuación, marcaos por lobbies económicos y polos intereses d’EEXX al traviés de la OTAN “Cuantu más representaos temos les formaciones d’izquierdes y pro drechos humanos , pro paz, más capacidá tendremos de frenar el el belicismu, el gastu militar y l’austericidiu” recalcó el diputáu d’ehBildu.

Darréu la intervención los asistentes participaron nun alderique colos oradores, cientrándose sobre tou en saber comu la participación d’Agora Repúbliques nel Parlamentu Européu puede influyenciar la política, tantu a nivel de frenar l’espoxigue belicista comu a nivel de meyorar el nivel de vida de los asturianos.