Iniciativa pol Asturianu convida a los candidatos a desplicar qué van faer dende’l parlamentu européu pol asturianu y apurre una riestra de datos perinteresante sobre la percepción de les llingües minorizaes por parte de los europeos.

Fasta agora la única formación que demostró un compromisu ensin fisures col asturianu foi Agora Repúbliques, organización de soberanistes d’izquierdes de tol estáu na qu’Asturies ta representada por Andecha Astur

La Rede Europea d’Igualdá Llingüística (ELEN, poles sos siegles n’inglés), colectivu qu’agrupa a 174 organizaciones que representen a 50 llingües y 50 millones de falantes en 25 estaos de la Xunión Europea y rede de la que forma parte Iniciativa pol Asturianu dende la so fundación en 2011, presentó esta semana una encuesta del Eurobarómetru a les puertes de la convocatoria electoral del Parlamentu Européu. L’estudiu sociolóxicu analizáu por ELEN recueye qu’una gran mayoría de europeos, una media del 84%, ta d’alcuerdu en que se deben protexer les llingües minorizaes. Esti compromisu col plurillingüísmu crez hasta un 88% nel Estáu Español

L’informe tamién desplica que un 90% de los ciudadanos ente 15-24 años creyen que los europeos debieren falar a lo menos una llingua adicional. Esti datu medra a un 92% de los encuestaos del Estáu Español, el mayor valor d’ente tolos Estaos Miembros. El muestréu sociolóxicu tamién apunta que’l 76% los europeos consideren que debieren priorizase polítiques enfotaes n’ameyorar habilidaes llingüístiques. 

Nesi sen, Iniciativa pol Asturianu considera que “concebir una Asturies n’Europa ye concebir una Asturies que salvaguarda les sos llingües minorizaes, protexendo (y ampliando) los drechos de los sos falantes y promoviendo l’usu de les mesmes; d’alcuerdu cola Carta Europea de les Llingües Rexonales o Minoritaries, de la que’l Reinu d’España ye firmante, sinón acordies cola voluntá de la gran mayoría de los europeos tal como espeya l’Eurobarómetru”.

A piques de celebrar la xornada electoral del Parlamentu Européu, l’asociación reclama compromisos pa defender los intereses de los falantes asturianos nel Parlamentu acordies cola voluntá de la mayoría de los ciudadanos d’España y de la Xunión y pidi tamién a los candidatos que despliquen qué van faer dende’l Parlamentu Européu pola llingua asturiana.

Fasta agora Agora Repúbliques ye la única candidatura que defendió dende l’entamu l’asturianu, utilizando esta llingua pa toles comunicaciones que cinquen a Asturies dientro la coalición, ufriendo papeletes n’asturianu, llevando la cuestión de la oficialidá en delles ocasiones al parlamentu europeu y amosando coherencia en tou momentu. El restu de formaciones pasen de la refuga y ataque direutu al asturianu a un pretendíu sofitu que nun s’espeya nes sos polítiques nin fechos, siendo ello qu’incluso los más favoratibles nun aplicaron normatives llingüístiques na mayoría de los conceyos que gobernaron nin tomaron midies más allá de la semeya pa dar la cara pol asturianu.

Nel Dos Santos

This work is licensed under a Creative Commons Attribution 4.0 International License.