Les cifres espeyen que’l gastu nel bientar ciudadanu na cabera década cayó fasta ser agora un 4’5% inferior a lo que yera nel 2014, lo que sumao a la fuerte inflación d’estos años amuesa un xabaz recorte de les prestaciones reales en sanidá, educación y proteición social
El Principado ye l’encargáu de garantizar a los asturianos los servicios que definen l’estáu del bientar: sanidá, educación y proteición social.
Acordies l’informe El gastu en Sanidá, Educación y Proteición Social nes CC.AA. espublizau por FEDEA Asturies ye, xunto a Castiella ya en muncho menor midía, Estremadura, les úniques “comunidaes” nel que’l gastu n’estáu del bientar cayó dende la pasada década.
En prauticamente tol estáu español esi gastu ye xorreciente, non solo pol enclín a la meyora social sinón porque esos diez años incluin la pandemia y les posteriores crisis que faen más importante que nunca la proteición de los más vulnerables y l’atención sanitaria. Destaquen dalgunos territorios nel so apueste pol bientar de los sos ciudadanos: les Islles Baleares medren esa inversión nun 23’7%, el País Vascu nun 15’7%, Cataluña nun 13’7%. Entantu Castiella, Estremadura y por supuestu, Asturies (-4,5%), prioricen otres cuestiones, restando presupuestu al bientar y dexando a un lláu los servicios qu’impliquen una vida meyor pa los sos habitantes.
Curiosamente vese un sesgu perpositivu naquelles zones nes que los partios propios reciben mayor sofitu, siendo especialmente negativu nos qu’amuesen un calter políticu pro centraliegu. Remembremos qu’Asturies presentó nel 2023 unes cuentes con superavit respeutu al presupuestu, ello ye, que sobraron perres.
Llucía F. Marqués
This work is licensed under a Creative Commons Attribution 4.0 International License.
