Esti vienres díi 31 de mayu, a les 19:00, tuvo llugar na llibrería La Revoltosa de Xixón la charra muerganizada pol coleutivu asturianu BATEL, Bloque Astur Trans En Llucha, comu presentación d’esti grupu y de la segunda edición del so fanzine, Manfloritaes
La charra, desendolcá dafechu n’asturianu, faló dende la perspeutiva de la disidencia sesual y tuvo una bona acoyía y una bultable asistencia.El fanzine Manfloritaes, angañu col so segundu volume, cuenta cola aportación d’una bultable estaya artística con conteníu d’ensayu, poesía en delles llingues y fasta pasatiempos.
Esta espublización, que se reapropia del términu asturianu manfloritu, ta cientrada na salú mental de les persones disidentes del sistema binariu del sesu-xéneru, amás de poner de relevancia la patoloxización y melicalización de la disforia y les identidaes de fora de la “normalidá” impuesta pola sociedá.
Tamién toca temes talos comu la corporalidá, la precariedá llaboral y la reivindicación llingüística, planteando l’usu de soluciones de xéneru n’asturianu que reflexen les identidaes trans non binaries, comu’l pronome ellei y les terminaciones -ei/-eis.
BATEL, comu pudieron desplicar leis sos integranteis na presentación y nel propiu fanzine, afítase nel internacionalismu, l’anticapitalismu y el feminismu dende una perspeutiva trans dual, ello ye, non binaria.
Dientru de los munchos temes trataos, leis integranteis siñalaron que nun se sienten identificaeis cola visión reduccionista y universalista del movimientu LGTBIQA+, qu’inora’l factor de la nación de nacencia, siendo’l ser asturianu/a/ei un factor más pa la discriminación patriarcal, dientru y fora’l país y l’estáu.
BATEL amosó les problemátiques específiques dientru’l marcu asturianu qu’afeuten anguañu al coleutivu LGTBIQA+ dende la concenxa de clas, dende la identidá asturiana y pol drechu a poder vivir y trabayar n’Asturies, la emigración forciada (tantu d’Asturies al estranxeru comu del campu a la ciudá) de la mocedá comu otra parte de la violencia cadarmal del patriarcáu escontra los grupos más discriminaos d’Asturies, non solo en cuantes a identidá de xéneru sinon tamién a clas social.
A nivel social esta muerganizacion ufierta una serie de recursos de sofitu, visibilización y concenxación sobro la salú mental, neurodiverxencia ya identidá de xéneru. D’esta miente plantega un espaciu d’escucha solidariu na que la xente del ámbitu LGTBIQA+ puea sintise acoyía, tantu en presona comu al traviés de Telegram o les sos rees sociales.
Aymara González Montoto
This work is licensed under a Creative Commons Attribution 4.0 International License.
