Más de mediu millar de manifestantes refugaron ayeri en Mieres el proyectu d’Hunosa pa recuperar l’actividá na central térmica con quema de biomasa y de combustible sólido recuperao
Depués de presllar mines y desactivar les térmiques “por motivos mediuambientales” Hunosa pretende aprofitar les instalaciones pa una actividá bultablemente más dañina pal mediu ambiente que les desaniciaes: la quema de residuos p’algamar combustible sólido recuperable, conocío tamién comu CSR.
Los mierenses tan indignaos cola propuesta, y asina lo ficieron ver nel manifestamientu qu’ayeri aconceyó a cientos de persones “Hay un complot ente’l Principado que nun sabe que facer cola basoria y quier colánosla equí, nes Cuenques. Nun lo vamos permitir” afitaben dende’l Conceyu contra la contaminación. Pela so parte, Fructuoso Póntigo, de la Cooridinadora Ecoloxista d’Asturies, remembraba que “Evidentemente una térmica nun ta preparada pa quemar residuos. Nun hai dengún estudiu científicu que diga que quemar residuos ye bono.”
L’ária recreativa de cardio foi l’escenariu final del manifestamientu, nel que tamién participaron grupos ecoloxistes de toa Asturies, colexos de la fastera y la organización política Andecha Astur, quienes reclamaron una política caltenible de xestión de les basories “Asturies precisa polítiques que garanticen una xestión sostenible de residuos, y un cambiu na mentalidá consumista na que tamos inmersos. La incineración de basories nun ye una solución, ye otru problema, ¡y grande!“.
La Plataforma Ciudadana contra la quema de FSR en Mieres y les distintes organizaciones ambientales lleven recoyies 5700 robles contra la propuesta y anuncien que les movilizaciones continuarán.
Llucía F. Marqués
This work is licensed under a Creative Commons Attribution 4.0 International License.
