Esti añu parte del festival VESU va desendolcase en Bueño, un de los pueblos con más horros d’Asturies, d’ende’l porqué d’esta actividá conxunta qu’entemez música, padremuñu, hestoria, cultura, natura y remangu.

El proyectu creativu y cultural Puru Remangu y VESU collaboren esti añu na cellebración de ‘Un VESU embaxol’horru’. La iniciativa, que va tener llugar el vienres 21 de xunu, va consistir nuna visita guiada per Bueño de la man de l’Asociación Horru Asturianu, que va entamar a les cinco y media na plaza de Bueño pa rematar a les siete y media debaxo d’un de los horreos que caractericen el pueblu, con un conciertu en formatu íntimu de Leticia Baselgas.

‘Un VESU embaxol’horru’ tien un númberu llindáu de places y pa poder participar va haber qu’acutar sitiu na web: www.pururemangu.com. La duración de la visita va ser d’una hora y media a la que se van sumar los trenta minutos de conciertu. El preciu por persona va ser de 15€.

PURU REMANGU ye un proyectu creativu y cultural creáu en 2018 pa visibilizar la identidá asturiana polo xeneral y la de les muyeres d’Asturies en particular. Güei ye un referente dientro del ámbitu de la revindicación de la cultura y de la llingua asturiana, del feminismu, de la comunicación y de la moda.

VESU El festival va cellebrase ente’l vienres 21 y el domingu 23 de xunu y estrena allugamientos: La Central Artística de Bueño (CAB) en La Ribera y los Xardinos de La Rodriga nel coral d’Uviéu, que van allugar tolos conciertos d’esta edición.

Alberto Rodríguez

This work is licensed under a Creative Commons Attribution 4.0 International License.