L’acampada que lleva más d’una selmana instalada nel Campus del Milán, siguiendo la estela del movimientu estudiantil mundial  contra’l xenocidiu que ta cometiendo Israel, recibió ayeri la visita d’un ultra facista coles idegues lo bastante tracamundiaes como pa facer el saludu nazi pa defender un estáu xudíu. 

“Sois un puto rebaño” ,”no teneis derecho ni a vivir” y “podeis comerme la pirula” foron dalgunes de las perles qu’acompañaron a los reiteraos intentos de prenunciar correchamente’l saludu alemán “Sieg Heil” brazu n’alto. L’energúmenu, identificáu como Nacho Moreno, llucía una camiseta de la Hermandad de Defensores de Oviedo, entidad fundada por ex combatientes del bandu golpista na posguerra a la que presuntamente pertenez.  

Antes d’abandonar la acampada, menació con tornar esa mesma nueche con sus amigos “de artes marciales”, menacia qu’afortunadamente nun cumplió pero que multiplicó la presencia d’estudiantes pro Palestina na mesma.

Dientro los llogros d’esta acampada ta l’abandonu de la collaboración de la Universidad d’Uviéu col proyectu TICHE, financiáu pola Comisión Europea con cuasi 5 millones de euros y que collabora con Aerospace Industries (IAI), principal fabricante d’armamentu israelí. Sicasí, entá nun consiguieron un posicionamientu firme por parte’l rector a favor del fin del ataque a Palestina. 

Llucía F. Marqués

This work is licensed under a Creative Commons Attribution 4.0 International License.