Nuna fecha tan emblemática comu’l 25 mayu, el diariu dixital Asturies.com anunció el so preslle definitivu, perdiendo Asturies un de los sos medios propios más conocios y el periódicu dixital n’asturianu con mayor percorríu nel tiempu
Asturies.com entamó’l so camín el tres de febreru de 1997, siendo pioneros na información n’asturianu nuna rede qu’entá taba lloñe d’algamar l’actual espardimientu. Demientres los caberos 28 años informó puntualmente de temes d’actualidá asturiana, dando siempres gran importancia a la llingua y cultura llariegues, trabayu que desendolcaron cuasique’n solitariu fasta’l nacimientu d’InfoAsturies en xineru del 2017.
Ayeri, escoyendo pa ello una fecha tan señalada pa los asturianos comu’l 25 mayu, anunciaba’l fin de les sos espublizaciones.La falta de viabilidá empresarial de la so empresa editora d’Araz Net SL, que cesa tamién la so actividá, ye’l motivu que ta tres del preslle de la páxina, que se despidía “dando les gracies a toles persones qu’estos años contribuyeron al proyectu: trabayadores, collaboradores, anunciantes, alministraciones y, sobre manera, a los y les llectores que foron la razón de ser d’esti mediu”.
Llucía F. Marqués
This work is licensed under a Creative Commons Attribution 4.0 International License.
