La plantiya de Trefileríes Moreda convoca dos xornaes de fuelga énte los repitíos incumplimientos de la empresa nel conveniu colectivu
Tres l’alcuentru nel SASEC, y la negativa de la empresa pa llegar a un alcuerdu, el comité de Trefileríes Moreda, que cunta con más de 200 trabayadores, convoca güei martes y mañana miércoles, 14 y 15 de mayu, dos xornaes de fuelga. La plantiya movilízase énte los repitíos incumplimientos que ta amosando la dirección de la empresa nel conveniu colectivu.
Dende’l comité denúnciase que ta habiendo una política de cero negociación y actuaciones abusives per parte de la dirección. Asina ta habiendo un espoxigue de cambeos de puestos de trabayu y de turnos, cambeos de categoríes profesionales (la empresa faciéndolo a la baxa, ensin definir munches vegaes les funciones…), non axudicación de trabayos (figurando puestos indefiníos como deprendices), poca seguridá llaboral (ta refugándose asistencia mélica con dolencies y la empresa decide si ye urxente o non allegar a la mutua), y asuntos rellacionaos cola llimpieza y la esternalización.
Por ello, y p’encamentar a la empresa a sentase a axustar y cumplir lo alcordao, la plantiya de Trefileríes Moreda va dir a la fuelga.
Nel Dos Santos
This work is licensed under a Creative Commons Attribution 4.0 International License.
