El Tribunal Cimeru de Xusticia d’Asturies acaba d’almitir a trámite’l recursu contenciosu alministrativu presentáu pol Conceyu contra la Incineración de Asturies contra’l resolvimientu de la Conseyería de Transición Ecolóxica, Industria y Desendolcu Económicu pola que s’autoriza a la central térmica de La Pereda, en Mieres, a utilizar CSR -combustible fechu con basura- como combustible secundariu.

El Tribunal Cimeru de Xusticia d’Asturies solicitó que se-y unvien nun plazu de venti díes los espedientes alministrativos correspondientes, debiendo l’Alministración amás dar en emplazar a los interesaos pa que puedan personase énte esti órganu xudicial nel plazu de nueve díes.

El recursu parte d’una denuncia del  Conceyu contra la Incineración, integráu por más d’una ventena de colectivos ecoloxistes, plataformes vecinales, partíos y organizaciones varies, quien caltienen qu’esti proyectu, promovíu por Hunosa, trai efectos bien perxudiciales pa la salú de los vecinos y que la citada actividá va implicar un impactu nocivu pal medioambiente nuna zona yá duramente castigada pola contaminación

Al tiempu, el Conceyu contra la Incineración sigue recoyendo fondos cola so campaña de micromecenazgu, al traviés de la fundación Mi grano de arena con una importante respuesta ciudadana, devasando yá’l 60% de los 10.000 euros que tienen como oxetivu.Con esos fondos financiaránse los costos llegales, de movilización y espardimientu de la llucha contra la quema de borrafes n’Asturies y l’implantación de cualquier planta incineradora.

Susana Sela