La Rede de güertos ecolóxicos escolares entra n’una nueva etapa gracies al sofitu de Caxa Rural d’Asturies y de la cooperativa Campoastur. Estes dos entidaes xúntense al COPAE, dinamizador de la rede, nel llabor de llevar les práctiques y valores de la agroecoloxía a los centros educativos y a les futures xeneraciones asturianes que se formen nellos.
L’actu de la robla del conveniu de collaboración ente les 3 entidaes realizóse nel Colexu Nazaret d’Uviéu. Esti centru escolar, parte de la Rede, utiliza’l so güertu escolar ecolóxicu como un recursu educativu con implante curricular en tolos cursos. Amás, realizaron colos sos escolinos y el sofitu de la rede un güertu urbanu fechu en bancales n’el mesmu patiu del colexu, colo que los escolares conviven con él tamién nos sos ratos d’arruelu.
La Rede de güertos ecolóxicos escolares d’ Asturies nació en 2012 de la man del COPAE. De magar entós xorreció bultablemente hasta algamar los 127 centros nel cursu 2023-2024 y a más de 6.000 escolinos. Y namás nel cursu 2022-2023 sumáronse 45 centros nuevos.
A lo llargo d’estos años realizáronse delles actividaes formatives nos centros de la Rede. En munchos casos, estes actividaes valieron pa poner en marcha nuevos güertos ecolóxicos educativos nesos mesmos centros y, n’otros, p’ameyorar les iniciatives hortícoles que yá se taben llevando a cabu en dellos centros. Amás, fomentóse’l contactu de los alumnos de los centros-rede con productores ecolóxicos del campu asturianu, al traviés d’escursiones subvencionaes.

Llucía F. Marqués

This work is licensed under a Creative Commons Attribution 4.0 International License.