AMA Asturies en collaboración con vecines y profes de Zarréu entama una sestaferia cultural nel monte del suroccidente asturianu.
Del 28 al 30 de xunu el pueblu de Zarréu, en Degaña, enllenaráse d’identidá, padremuñu y cultura asturiana con conciertos, baille tradicional, gaites , panderetes, actividaes pa la reciella, meses redondes y l’estrenu mundial d’una película d’Alex Galán.
Los organizadores destaquesn qu’esta sestaferia cultural nun pretende ser un festival al usu, sinón un eventu comuñal “qu’apuesta pola cultura como pegollu del pueblu. Una lluz que sirva p’allumar el futuru pa esta tierra precisada de proyeutos, emburrie social, curiáu per parte de les alministraciones ya impulsu nel ánimu de la población que faiga espoxigar la zona y a los sos habitantes. Ente toes vamos demostrar que les zones rurales en peligru de despoblamientu n’Asturies nun tán muertes y tienen futuru gracies al trabayu comuñal de la so xente”.
Tanto los conciertos comu la zona d’acampada serán de baldre tou’l fin de selmana.
Nel cartelu qu’anuncia l’eventu, diseñáu por Alba Velázquez, podemos ver el padremuñu industrial asturianu cola llinia de baldes tresportando’l carbón pel valle y el padremuñu inmaterial cultural col baille y les muyeres como protagonistes.
Alberto Rodríguez
This work is licensed under a Creative Commons Attribution 4.0 International License.
