Depués del discursu nel Teatru Campuamor, nel que’l presidente de la Academia de la Llingua Asturiana, Xosé Antón González Riaño, afaló’l consensu políticu en favor de la oficialidá, recalcando que “Nun hai xustificación pa nun intentar alcuerdos nesta llexisllatura” y de la contundente reclamación de los asturianos nel manifestamientu del sábadu, Adrián Barbón nun tien otra que tornar garrar el testigu de la Oficialidá

37 años de manifestamientos multitudinarios tuvieron esti sábadu otra edición n’Uviéu, enllenando la cai Uría d’una reclamación mui concreta, la reclamación d’un drechu humanu, reconocíu llegalmente, el d’utilizar la propia llingua en tolos ámbetos de la vida, daqué que nel marcu llegal actual nun pue algamáse si nun ye a traviés del reconocimientu qu’otorga la tan naguada oficialidá. 

Pente los que reclamaron los drechos llingüísticos, asociaciones culturales, de reciella, músicos, docentes, sindicatos y dalgún partíu, con ausencies sinificatives, la presencia de los que nunca faltaron y la chocante participación del mesmu partíu que traicionó la causa con falses promeses y a quien se ta reclamando q’actúe (¿manifestábense contra si mesmos?).
Leticia Baselgas  y Pau Santirso foron los encargaos de poner el ramu al manifestamientu, con una intervención na que nun faltaron acusaciones directes y reclamaciones mui concretes a la clas política asturianana “que nun ye quien a ponese d’alcuerdu no que tenía que ser un consensu democráticu básicu”, acusándola de “allargar l’agonía”, dexando pasar los años ensin actuar, naguando por que la presión cultural del español vaiga dañando la tresmisión llingüística, pero ensin conseguilo porque “nun mos damos”.

“N’Asturies, cuando se trata de derechos, xusticia y llibertá, nada ye cenciello. Tenemos delantre’l mesmu conglomeráu ultra y mediáticu que lleva mediu sieglu tratando de facenos desapaecer del mapa. La movilización de la so maquinaria de basura y mentires foi escepcional. Son sabedores de que llograr derechos fundamentales llama depués a otres aspiraciones nueves, a otros horizontes nuevos” declaró Pau Santirso, prevocando l’aplausu de los presentes, pa lluéu llanzar la entruga “¿qué van facer los que dicen defender la oficialidá?, ¿qué ye lo que van facer yá, agora mesmo? Nun val con dicir tar a favor y nun facer nada” declaró, apuntando lluéu directamente al PSOE, reclamando-yos coherencia pente declaraciones y  fechos.

“Nós vamos siguir, sí. Pero ¿qué va facer la nuesa clas política? ¿Qué van facer les nuestres representantes ehí, na Xunta Xeneral? ¿Qué va facer el PSOE? ¿Va dexar qu’Asturies siga careciendo un estatutu de segunda, del sieglu pasáu, y too por nun saber lliderar la modernización que precisa?” 

Depués d’esti discursu, de la igualmente nidia y contundente intervención del Presidente de l’ALLA y de la clara voz de los asturianos nes cais d’Uviéu, tornen a sentise campanes d’oficialidá na Xunta Xeneral. Nun queremos ilusionanos muncho porque ya tenemos muncha esperiencia en declaraciones valeres que nun lleguen a dengún llau, pero quien sabe, anantes o dempués tienen que doblar y reconocer esti drechu, porque nosotros, los asturianos, nun vamos danos. 

GALERÍA DE SEMEYES

Llucía F. Marqués

This work is licensed under a Creative Commons Attribution 4.0 International License.