En total son 42 les ganaderíes afectaes, 28 que tienen contratos roblaos con Danone, que col preslle de Salas ya nun fabrica n’Asturies y 14 con Arias. Sicasí, Arias seguirá beneficiándose de la reputación de los productos llacteos asturianos, al continuar cola so sede en Vegalencia (Ribera d’Arriba).
En xunetu les mantegueres Arias dexarán d’utilizar llechi asturiana, rompiendo los contratos colos ganaderos que yos la suministraben fasta agora. Lo mesmo fadrá Danonde, n’ochobre, pesi al so compromisu de caltener los contratos tres el preslle de la planta de Salas -onde l’alcalde considera oportuno caltener una estatua de la so mascota-. Pente les dos empreses tamos falando d’un total de 36 millones de llechi al añu que quedarán ensin comprador, afeutando gravemente al sistema productivu de llechi nel campu asturianu y dexando a 42 esplotaciones llactees al debalu.
Los sindicatos desixen un “pronunciamientu darréu” del Gobiernu del Principado sobre esta cuestión ya’l so sofitu a los ganaderos afectaos.
A los consumidores asturianos pídese’l boicó a estes marques como amuesa de la refuga social a esta decisión y como sofitu a la ganadería asturiana y a aquelles marques qu’entá apuesten polo de nueso.
Llucía F. Marqués
This work is licensed under a Creative Commons Attribution 4.0 International License.
