Cenciellu y nidiu analís del camín marcáu polos sos gobernantes p’Asturies, alcontrau nel Blog UHP, que vos convidamos a lleer

“Asturies y la so gobernancia lleven yá unos años apostando fuerte pola terciarización de la so economía, en concretu por crear un nuevu modelu turísticu, más masivu, más invasivu y más rentable pal beneficiu priváu”.

Hai unos meses, los medios de comunicación oficialistes asturianos dedicaben ríos y ríos de tinta y munches hores de conteníu radiotelevisivu a la apertura de la variante de Payares, obra que comunica los 49 kilómetros que separten La Robla col Conceyu de L.lena. A la fin, la llínia d’alta velocidá ferroviaria que comunica Asturies cola meseta, quedaba nagurada. Los medios y la burocracia política asturiana corrieron a poner en valor dicha naguración, omitiendo a la población años y años de retrasos y dexando atrás la desvergoña d’anunciar 17 feches d’apertura falses. Los asturianos, na so mayoría, quedaben contentos por tal asocedíu y escaecíen toles promeses incumplíes y la retorica populista qu’arrodió esta obra dende instancies gubernamentales.

Unos díes depués, con una inflación desbocada n’Asturies y bona parte del contestu européu, Adrían Barbón sacaba pechu nuna perconocía rede social de los bonos datos en turismu y hostelería. Señalaba a los críticos viniendo a decir que non tou yeren malos datos, mentanto espublizaba estos datos y daba-yos difusión. L’actitú, de fechu, yera la d’un caudillu benévolu que presentaba al so pueblu un gran trunfu políticu pesie a tar asediáu de milenta cuestiones a la contra de la so xestión, contradicciones y problemes qu’ellí mesmu asumía, pero depués d’abrir la Variante de Payares quedaben como problemes de segundu orde. Pero bono, a nivel de comunicaciones cola meseta (Madrí) y de recaudación de la pequeña burguesía del seutor que vive del turismu, había oxetivamente bonos datos que presentar a los asturianos. 

Per otru llau, en febreru los principales medios asturianos de comunicación solliñaben qu’Asturies foi en 2023 la única autonomía d’España na qu’hebo una xuba de la compraventa de vivienda, concretamente un 5,3 % más respeuto al añu anterior según l’Institutu Nacional d’Estadística (INE). Esti últimu datu, confirmaba la tendencia d’Asturies en rexistros de compraventa de vivienda dende l’aniciu de la pandemia, con datos perriba la media estatal dende l’añu 2021. 

Va pocos díes, entamando abril, otru datu solliñable apaecía no que cinca a la cuestión del mercáu de la vivienda. La Federación Nacional d’Asociaciones Inmobiliaries (FAI) y la Unión d’Inmobiliaries d’Asturies complementaben los datos de febreru indicando que namás el 35% de les compraventes de vivienda n’Asturies correspondíen a residentes n’Asturies, el restante corresponde a persones que nun son o a lo menos nun yeren residentes n’Asturies, un 43% xente de fuera del estáu y otru 25% que reside n’otres autonomíes, principalmente la Comunidá de Madrí. 

Estos datos y esta coxuntura complementen otra riestra de datos que llevamos enviendo n’Asturies sobre’l puxu del fenómenu turísticu y la xentrificación de la nuestra realidá social nos caberos años. Dende qu’entamó l’andanciu o la pandemia’l Covid 19, Asturies pasó a ser un destín turísticu renomáu dientro y fuera l’estáu por mor de delles cuestiones. Podemos equí dir al fechu de que vendióse Asturies como un destín seguru, con un clima diferente o con una concentración poblacional y bayura natural non equiparable a otros territorios d’España y tamién d’Europa. Ta nidio que na temporada de branu, como nos caberos años, veremos grandes datos d’ocupación, beneficios estraordinarios de tolos seutores que xiren alredor del fenómenu turísticu y una gran masificación de los nuestros espacios naturales o padremuñales. 

El discursu políticu, per otra banda, tamién paez xirar namás alredor d’esta cuestión. La parte gobernante seguirá cincando na idea de qu’Asturies va bien sacando datos alredor del trunfu turísticu y la “oposición” seguirá pidiendo más cuantitativamente nesti terrén. Lo ciertu ye que’l destín d’Asturies y per ende los asturianos va venir marcáu nos años que vienen pola turisficación y los sos resultaos. L’amuesa d’ello ye la presencia nel debate públicu d’esti fenómenu y la descomanada inversión publicitaria del Gobiernu d’Asturies, tanto a nivel estatal como internacional, d’Asturies como destín turísticu y enfocáu al ociu. Por supuestu, tou ello acompañáu pola insistencia del señor Barbón vía redes sociales de seguir marcando esti camín, lo que yá entama a convertise n’obsesión pela banda’l presidente.

Pa facenos una idea de la miseria moral na que vive la burocracia política asturiana, como cuestión aneudótica, pero sinificativa, hai unos díes l’alcalde’l Conceyu de Salas llantó una horterada en forma d’estarua nuna retonda’l conceyu de “Danonino”, imaxe corporativa de Danone. Pa los que nun tienen memoria, Danone peslló la so planta de Salas hai unos años, tres meses de fuelga per parte la so plantía, dexando vendíes y na cai a 69 families. Por supuestu, la planta nun yera deficitaria, pero la marca francesa consideró oportunu depués de 41 años de produición llevar l’actividá a Francia, anque cola pretensión futura de desllocalizar la planta fuera’l propiu centru imperialista. L’alcalde de Salas posaba en prensa muy arguyosu, al tiempu que falaba cola prensa de que serviría pa recordar los años de Danone nel conceyu y tamién p’atrayer turistes. Turistes de los productos llácteos, entendemos. Una pixada como decimos n’Asturies, pero qu’espeya perbien la época que vivimos nel nuestru país. D’una sociedá qu’en bona parte taba cohesionada pol movimientu obreru a mirar p’arriba pa ver si echen dalguna llimosna.

Pero, ¿paga la pena esti apueste y l’Asturies que ta quedando? 

Como cualesquier lleutor, hasta’l menos avezáu, puede entender, Asturies y la so gobernancia lleven yá unos años apostando fuerte pola terciarización de la so economía, en concretu por crear un nuevu modelu turísticu, más masivu, más invasivu y más rentable pal beneficiu priváu. La Federación Socialista Asturiana nun tien nengún problema güei n’asoleyar la so voluntá de seguir apostando por esti modelu económicu pa la nuestra realidá y en concretu’l Presidente’l Principáu nun escuende les sos cartes. De fechu, el fenómenu de puxar pola terciarización lleva décades enriba la mesa, pero nos caberos años la dinámica vien siendo yá descarada y esto ye sinificativu teniendo en cuenta que tanto’l seutor primariu como’l secundariu fueron claves na economía asturiana nel sieglu XX.

Hai destinos nel espaciu terrestre que podemos llegar a entender que namás basen la so estructura económica nel turismu, yá seya por pura tradición o idiosincrasia, yá seya por nula viabilidá estratexica de fontes económiques y productives que xeneren valor. Lo ciertu ye qu’Asturies representó bien dende la propia Revolución Industrial una suerte de modelu mistu, qu’esplotaba un turismu mui arreyáu a la propia bayura natural y antropolóxica’l territoriu pero que ponía tolos enfotos económicos en puxar pola primacía de los seutores que de verdá xeneraben valor. Otru alderique, nun ye l’envís d’esta nota, ye l’apropiación del beneficiu netu que xeneraben les actividaes productives más importantes dientro d’esti país, fechu evidente siendo Asturies parte de la estructura capitalista mundial.

Lo ciertu ye que dende la llamada reconversión industrial impuesta dende la Europa’l Capital, Asturies nun apara de perder texíu productivu y la centralidá de les actividaes económiques que figuren en términos macro nun apara de perdese. Nun ye cuestión agora d’afondar en que pasó colos fondos europeos que se destinaren equí pa compensar la imposición del peslle de la industria asturiana, cimera hai unes décades, pues tol mundu más o menos tien una idea bien formada de la corrución a la quw llevaren. Pero si a entamos d’esti sieglu alcontrábemos yá una Asturies en vía muerta, ónde nin tan siquier el capital ufría a les xeneraciones nueves del pueblu trabayador alternatives pa reproducir la so fuercia de trabayu, preba d’ello son les descomanaes cifres d’emigración llaboral xuvenil que lleva protagonizando yá delles décades, la situación anguañu tornose entá más complicada. 

Los datos y fechos colos qu’entamó esti artículu, tienen de ser entendíos con otres nociones estadístiques básiques pa entender cómo ye la situación social y económica de la clase trabayadora na Asturies d´anguaño. Ensín querer entrar en cuestiones perdetallaes, como yá s’espeyó nesta nota, la emigración ente la mocedá asturiano foi dende los años noventa y los años caberos, d’una media de 15.000 a 18.000 persones, mozos que nun alcontraben nenguna alternativa llaboral real dientro les llendes asturianes y tuvieron que colar bien a otres fasteres del estáu, bien a otres rexones d’Europa. A esti fenómenu, que yera evidente, Tini Areces tuvo’l valor de llamalo lleenda urbana. 

Poro, con tolo equí desplicáu, paez qu’Asturies entró yá na dinámica global nel centru imperialista de xentrificación y terciarización, dinámica na que yá entró cuantayá pero los poderes trataben de disimular. Principalmente la FSA, organización que necesitaba axitar esi folclor obrerista pa rescatar votos nes zones postindustrializaes, con Barbón cambió de timón y si bien nun puede permitise arrenunciar a esi folclor obrerista yá entama a mecigayalo con nuevos elementos, estos de primer orde, como la batalla por ver quién ufre más alternatives a la turistificación y xentrificación. Del asturianismu de nuevu cuñu qu’empobina Barbón podemos falar otru día. 

Lo ciertu ye que en toles rexones xeográfiques del centru imperialista nes qu’esta orientación económica ganó pesu, cada vuelta son más, por ciertu, les consecuencies pa la clas trabayadora son siempre les mesmes. Un accesu a la vivienda prohibitivu, trabayos cada vuelta más depauperaos, masificación d’espacios naturales y con cierta singularidá, accesu cada vez más complicáu al ociu pa los trabayadores y rotura total de los llazos de vecindá y solidaridá social. El “nativu” alcuentra cada vuelta’l so espaciu social natural más hostil mentantu’l mesmo espaciu va mutando a los porgüeyos y la cosmovisión del turista. N’Asturies esti fenómenu llega tarde, si, pero paez llegar con muncha fuercia. ¿Quién va desplicar de verdá a los asturianos les consecuencies y el cambeu de paradigma que van percibir nel so territoriu? ¿Quién?

Sobre xentrificación y turismu hai munchos artículos ya investigaciones, incluso dende perspeutives y cosmovisiones emancipadores como’l marxismu. Convidamos a la xente a qu’acuda a estes espublizaciones pa formar una mayor idea’l problema. Esta nota namás quier allertar a los asturianos, pero non namás a ellos, de la dinámica que tamos viviendo. Los cuadros que n’Asturies tienen una perspeutiva de clase y faen un trabayu políticu nesti sen han de mirar cada día más a esti fenómenu. Esti yera l’envís d’esta nota, que yá ye sabíu que muncha xente honesta tien presente, pero que naide nun inore la dinámica de convertir Asturies en parque temática, pues quiciabes dientro d’una década seya tarde. Pero tamién puede servir la impugnación d’esta dinámica como elementu aglutinador y tresformador a la llarga. Mentanto, Asturies alienda entá, anque cada vuelta menos. 

¡ASTURIES NUN TA EN VENTA!

This work is licensed under a Creative Commons Attribution 4.0 International License.