Les anotaciones marxinales d’esti estraordinariu -pero poco conocíu fuera l’ámbetu académicu- códice illustráu apurren interesantes datos de les corrientes intelectuales na corte d’Uviéu
La Biblia de Danila, tamién conocida como Codex Cavensis 2, ye una Biblia llatina ilustrada, del sieglu IX o principios del X, roblada por una escriba llamada Danila y creada nel Reinu d’Asturies, mientres el reináu d’Alfonso II. Anguañu caltiense n’abadía de Santísima Trinidá, cerca de Cava de’ Tirreni en Campania, Italia.
La edición facsimilar de la Biblia de Danila» realizóse nel 2010 y agora el Principáu y l’Editorial Impronta presenten ‘Glossae Cavenses. Exéxesis bíblica en la Asturies del siglo IX’, la edición completa del corpus de más de quinientes gloses marxinales qu’acompañen esti códice bíblicu asturianu del sieglu IX.
El profesor Paolo Cherubini, Vice Prefeutu del Archivu Secretu Vaticanu y catedráticu de Paleografía de la Scuola Diplomática Vaticana y de la Universidá de Palermo, espertu mundial n’estudios bíblicos altomedievales ye’l responsable de la edición d’esta obra, siendo’l máximu conocedor del códice y estudiosu del mesmu dende fai más de 25 años.
Estes gloses, que figuren nos marxes y espacios interlliniales del testu bíblicu constituyiríen el primer testimoniu d’exéxesis escrituraria n’Asturies y permiten conocer les corrientes intelectuales dominantes na corte uvieina d’empiezos del sieglu IX, al empar qu’amuesa la manera de llectura y usu d’un códice bíblicu na Europa altomedieval.
Llucía F. Marqués
This work is licensed under a Creative Commons Attribution 4.0 International License.
