Covadonga Tomé, Xune Elipe y Laura Tuero, espulsaos toos ellos de Podemos Asturies, planteguen la creación d’un nuevu partíu, del que por agora namás sabemos que quier integrase’n Sumar
La diputada autonómica Covadonga Tomé, cuya espulsión de Podemos foi ratificada el pasáu 12 de marzu xunto a Xune Elipe y Laura Tuero, vien d’anunciar la creación d’un nuevu partíu políticu n’Asturies. El partíu “allugaráse nel espaciu progresista” y “seguirá la mesma fueya de ruta que Podemos”, aspirando a participar nes prósimes elleiciones autonómiques del 2027.
Nun se conoz entá’l programa, cadarma o siquiera nome del nuevu proyeutu, pero si se sabe, dende anantes siquier de da-y sigles, que tien la intención d’enganchase al carru de Sumar, lo qu’evidencia que sedrá otru proyeutu coles mires puestes en Madrí, con tolo qu’ello conlleva de priorización de los porgüeyos estatales per delantre de los asturianos.
Llucía F. Marqués
This work is licensed under a Creative Commons Attribution 4.0 International License.
