L’Asociación Federal Drechu a Morrer Dignamente, cola participación y collaboración de la Universidá d’Uviéu, la Facultá de Sicoloxía, la Conseyería de Salú y CCOO d’Asturies entama les IV Xornaes “Vida Digna, Muerte Digna, 40 años de revindicación” que van desendolcase a lo llargo de los díes xueves 18 y vienres 19 d’abril nel salón d’actos de la Facultá de Sicoloxía, n Uviéu.
L’oxetivu de les Xornaes ye esaminar el desenvolvimientu de los drechos a la fin de la vida y de la llei d’eutanasia dende la so aprobación nel añu 2021.
Van tratar d’analizar los progresos y los problemes surdíos n’aplicación de la llei, aldericar sobro dificultaes y esmoliciones que se presenten na interpretación de la mesma dende’l puntu de vista xurídicu y sanitariu, el papel de los distintos niveles asistenciales y l’ellaboración de propuestes pa siguir avanzando na ampliación de drechos pa consiguir la plena autonomía.
Cuntaráse cola participación d’espertos d’estremaes disciplines de dellos puntos d’España, dando la oportunidá d’averase a conocer lo que piensen, lo que sienten y les motivaciones de les persones que soliciten l’ayuda pa morrer al traviés d’un estudiu realizáu pola Universidá de Granada.
L’actu d’inauguración que va tener llugar el primer día de les Xornaes, el xueves 19, nel Edificiu Históricu de la Universidá. C/ San Francisco 3. Uviéu, va cuntar cola participación escepcional del escritor xixonés Ricardo Menéndez Salmón que va impartir xuna conferencia tituladan “Morrer na era del algoritmu: un camientu”.
Estes Xornaes van presllar con una alcordanza de la hestoria de l’Asociación Federal Drechu a Morrer Dignamente, al cumplise’l so 40 aniversariu de llabor defendiendo’l drechu de toles persones a decidir con plena autonomía y llibertá la forma y el momentu final de la so vida.
Nel Dos Santos
This work is licensed under a Creative Commons Attribution 4.0 International License.
