El gobiernu asturianu sigue apostando pol turismu comu camín pa sacar a Asturies alantre, condergando a los asturianos a trabayos precarios y mal pagaos: el salariu mediu del sector  hostelería ye d’un terciu del salariu mediu industrial.

El sector servicios, especialmente na so estaya cientrada na hostelería, xenera trabayos de peralta precariedá, con horarios d’abegosa conciliación familiar y personal, alta temporalidá y fuerte vulnerabilidá a cualisquier contratiempu económicu. Aparte, ye un de los sectores con mayor abusu llaboral ya incumplimientu de condiciones, con xornaes allargaes de continuo, impagos d’hores estres y condiciones llaborales n’ocasiones mui perbaxo de lo aceutable. 

“N’Asturies el salariu mediu industrial dobló al del seutor servicios en dos décades. La clave ta nos salarios infames de la hostelería y, anque menos, de determinaos comercios. En 2002 el salariu mediu xeneral yera de 24.637 euros, l’industrial de 27.338 y’l de servicios de 21.176. En 2022 yeren, respeutivamente, de 35.817, 46.489 y 28.980. Esti ye’l modelu económicu potenciáu pola empresa asturiana y mimáu pol gobiernu colonial” resume David M. Rivas, profesor xubiláu de Cadarma Económica na Universidá Autónoma de Madrid.

Les cifres falen por si soles, pero nun podemos escaecer que cuando falamos de “sector servicios” incluyimos munchos otros servicios meyor pagaos que los venceyaos a la hostelería, comu el sector sanidá o drechu. Si nos cientramos no que cobra de media un camareru, la cifra baxa a los 16.680 € (30.000€ menos qu’un salariu industrial) y una llimpiadora de pisos -trabayu fuertemente feminizáu- cobra entá menos, 14.544 € de media, una tercera parte que lo que gana un trabayador/a industrial.

Llucía F. Marqués

This work is licensed under a Creative Commons Attribution 4.0 International License.