L’actu de presentación va tener llugar nel CIDAN de La Pola Llaviana, ta programáu pa les 7 de la tarde d’esti vienres, 5 d’abril, con empiezu y remate de música tradicional
La coleición Terrén echa a andar con La cultura tradicional en Llaviana, volume que recueye, en cuatro capítulos, una parte de la estensa obra del académicu correspondiente Vicente Rodríguez Hevia, asoleyada a lo llargo los años nes publicaciones periódiques de l’Academia de la Llingua Asturiana (ALLA).
Conformen estos testos un corpus pernecesariu pal entendimientu cultural, social, económicu y territorial del conceyu de Llaviana y reconocen al autor llavianés nel so llabor investigador. Nesti volume
trátense los temes rellacionaos col espaciu cultural tradicional: los periodos de la güerta y la collecha, l’usu del horru como’l foru del pueblu, la toponimia menor, etc. A ello amiéstase un repasu históricu
del aprovechamientu de recursos del ríu y el monte y una descripción de les celebraciones del conceyu Llaviana.
Na presentación del llibru ta prevista la participación de representantes de la corporación llavianesa, del presidente de l’ALLA, Xosé Antón González Riaño, y del direutor de la coleición Terrén, Roberto González-Quevedo; amás de l’asistencia de dalgunes de les máximes autoridaes polítiques del Principáu y del Conceyu.
Susana Sela
This work is licensed under a Creative Commons Attribution 4.0 International License.
