Ye la quince vuelta que Xixón va abellugar la regata francesa, que va tener tres etapes y más de 1.840 milles de navegación
La Solitaire du Figaro Paprec, competición internacional con un tipu únicu de barcu, por tiempos y ensin asistencia, que se disputa por etapes y qu’entama la sociedá OC Sport-Pen Duick, arrinca’l 17 d’agostu en Rouen (Francia), p’aportar a Xixón pela décimoquinta vez na so hestoria – y primera de magar 2017- el xueves 29 d’agostu, y va finar en Royan (Francia) metanes setiembre. Ta considerada como una de les pruebes reines de la navegación oceánica, cita imprescindible pa los regatistes profesionales y antesala de grandes regates internacionales oceániques.
El percorríu de la 55ª edición de La Solitaire du Figaro Paprec va tener asina tres etapes inédites del 17 al 15 de setiembre: 1.840 milles náutiques ente Rouen (Seine-Maritime) y La Turballe (Loire-Atlantique), pasando per Xixón, única ciudá peninsular que va acoyer la regata francesa, y Royan (Charente-Maritime).
La regata francesa, que celebra la so 55 edición, recaló pela primer vez en Xixón en 1991 y hasta 2004 vióse cuasi toles temporaes a los veleros nos pantalanes del Puertu Esportivu. Tuvo un paréntesis hasta 2010, pa repetir en 2012, 2013 y 2017. El branu viniente, los navegantes volverán a alcontrase cola bahía de San Llorienzo pela decimoquinta vez.
La épica de la navegación en solitario contribuyó a qu’esta regata s’afite ente les de mayor prestixu de la vela mundial. Poro, cada edición síguese de forma masiva por aficionaos de tol mundiu y conviértese nun gran vehículu de promoción de cada una de les ciudaes que s’asocien a la competición francesa.
Alberto Rodríguez
This work is licensed under a Creative Commons Attribution 4.0 International License.
