Vienres santu, siete chigres, una fiesta práu, una espicha, un llagar, gaita, xaréu, tola sidre que pueas beber y un autobús pa dir d’un sitiu a otru ensin complicaciones. Queden pocos díes p’apuntase al Sidracrucis y sidrificar les fiestes
Queden pocos díes pal Sidracrucis, la tradicional procesión que lleva a los sos participantes de chigre en chigre nuna pelegrinación qu’esti añu visitará los conceyos de Xixón, Villaviciosa y Nava, saliendo los autobuses d’Uviéu y Xixón.
L’eventu entamará a les doce’l mediudíe, col culín inaugural y el repartu d’identificaciones, pa salir darréu siguiendo al gaiteru peles cais de la ciudá, y nun finará dica les diez de la nueche, cuando l’ autobús lleve a los esforciaos pelegrinos de vuelta a casa.
Pela mañana sedrán tres los chigres xixoneses que recibirán la visita de la marcha sidrera, con barra llibre de sidre y pinchos: La Montera Picona de Ramón, El Mostachu y el Trebol, anantes de desfilar per Cimavilla hasta la Primer Sidra l’Añu. Allí, amás de tastiar llibremente la Sidra más nuevo de los llagares asturianos y participar nes actividaes del eventu, recibirán un “kit sidreru” gastronómicu, pa seguir forrando y que la sidre nun siente mal.
Darréu, el sidrobús llevará a los penitentes a Villaviciosa, onde conocerán el llagar de Cortina nuna prestosa visita guiada.
La cabera parada, Nava, con paraes nes sidreríes Plaza y Florida anantes de la espicha final nel Llagar de Lolina.
Nel percorríu sedrá prescriptivo canciar el Xermanín, himnu oficial de la procesión “Xermanín, Xermanín / echa un culete / Xermanín, Xermanín / echa un culín. / ¡Échalu, dende bien altu!! / ¡Échalu, qu’espalme bien!!”
Tou ello –sidre, pinchos, kit sidreru, más sidre, autobús, espicha, música’l país y tola Sidre que se seya quien a beber- tien un coste de 75 €.
Les persones interesaes pueden acutar plaza, pero queden namás un par de dies pa ello, asina que toca aputar. Pueden facelo nel teléfonu de contautu 652.594.983 -llamada o whatsapp- o nel corréu electrónicu info@lasidra.as.
Alberto Rodríguez
This work is licensed under a Creative Commons Attribution 4.0 International License.
