Na mañana d’ayeri miércoles 20 de marzu cellebróse la segunda Mesa Sectorial de plantiyes d’Educación pal cursu 2023/2024, ensin atender la mayoría de les reclamaciones de los cientros educativos

Namás 6 de les reclamaciones que los sindicatos recibieron de los centros educativos y tresmitieron a la Conseyería d’Educación foron atendíes pola alministración, lo que pal sindicatu d’ensiñantes asturianos SUATEA “amuesa con cifres la falta de sensibilidá de la Conseyería d’Educación escontra les demandes de los centros educativos y la preminencia de criterios economicistes. Y ello magar de ser éstos los conocedores de primera mano de les necesidaes del so alumnáu y del personal indispensable p’atendeles”.
Dende SUATEA consideren esta plantiya orgánica de 9516 docentes nidiamente insuficiente, ya qu’implica que va ser necesario contratar a cerca de 2000 interinos/es, afondando nel problema de la falta d’estabilidá d’esti personal.
Con esta escasa plantiya, denuncien, nun se cumplen los alcuerdos de plantiyes suscritos colos sindicato nun se reverten los retayos sufiertos a lo llargo de los años, sinón tolo contrario y tampocu se permite l’amenorgamientu d’hores llectives nel cuerpu de maestros nin l’amenorgamientu llectivu pa mayores de 55 años.
Ta nidio que la decisión de nun contratar personal abondo ye contraria a la defensa de la Escuela Pública, nin na zona rural nin na zona urbana, onde compite cola privada que se refuerza presupuestariamente, siendo imposible atender afayaizamente la diversidá de los escolinos, nin que dicir amenorgar ratios y meyorar la ensiñanza.
Y comu ya ye vezu,  nun se contempla la especificidá cultural y llingüística asturiana dotando la plantiya orgánica con profesoráu especialista.

Llucía F. Marqués

This work is licensed under a Creative Commons Attribution 4.0 International License.