Decenes de persones acompañaron a la UMAC al trabayador despidíu de la Empresa Municipal d’Agües, denunciando la discriminación por discapacidá, la negativa de la empresa a asigna-y un puestu compatible cola so capacidá y la violación del drechu fundamental a la llibertá sindical

Tres de la interposicion d’una demanda contra la empresa onde se busca la nulidá del despidu, Jonathan Chichas allegó a la UMAC (Unidá de Mediación, Arbitraxe y Conciliación) esperando una rempuesta a los argumentos vertíos na mesma, pero la representación lletrada qu’acudió por parte de la empresa nun fexo denguna manifestacion al respeutu y l’actu concluyó ensin avenencia.

Fuera, decenes de persones demostraron com pancartes el so sofitu col trabayador, denunciando que’l so casu cumple con tolos condicionantes qu’afecten a un númberu pergrande de trabayadores. Si el despidu se confirma, sentaríase un pelligrosísimu precedente, abriendo la puerte al despidu de persones enfermes o incluso, como nesti casu, a la espera de la valoracion de minusvalía.

Tamién se punxo l’acentu nel fechu de que’l despidu ta influenciau pola actividá sindical que’l despidíu lleva tiempu desendolcando na empresa, polo que se ve un nidiu sesgu de represión sindical na decisión, otro atentáu a les llibertaes de los trabayaores.

Agravando más la situación, la denunciada ye una empresa pública, que non sólo se niega a acatar les sentencies del TJUE y del TS sinón el so propiu conveniu colectivu, que dispón nel so artículu 51 la readaptacion del puestu.

Amás de la denuncia por represión sindical y discriminación por discapacidá frente a la Empresa Municipal de Aguas-EMA, los concentraos recordaben qu’hai una riestra de problemátiques que sumen y agraven la situación, “como son les descomanaes llistes d’espera, la falta de medios nos equipos de valoración de minusvalía, el modus operandi de les mutues que non sólo nun t’atienden adecuadamente, sinón que son les primeres en derivate a la seguridá social cuando la cosa se complica o en date l’alta en cuantes pueden”.

Alberto Rodríguez