La Empresa Municipal d’Agües de Xixón (EMA) foi sancionada pola Confederación Hidrográfica con 1500 euros por arramaos d’agües residuales al ríu Pinzales procedentes del polígonu industrial de Somonte
La Confederación Hidrográfica del Cantábricu resolvió un espediente sancionador contra la EMA pol que foi multada con 1500 €, más 792 € por daños al dominiu públicu. La denuncia foi interpuesta pola Coordinadora Ecoloxista por cuenta d’unos arramaos d’agües residuales y d’escorrentíes al calce del ríu Pinzales procedentes del polígonu industrial de Somonte, apreciables d’avezu al altor de la ponte de la cai José Llama Fernández.
Esti problema ye persistente y continúa una situación na que nin el Conceyu de Xixón nin el Principáu tomen midíes pa evitar la contaminación d’esti ríu que suma los arramaos al yá bien contamináu ríu Aboño. Tou esti volume de contaminación acaba na mar y les corrientes abasnenlo al restu de sableres de Xixón y a les de la mariña de la esnala oriental. Coles mesmes, la denuncia de la Coordinadora Ecoloxista ye contundente: Cantidaes de 1500 euros son testimoniales y nun van evitar que les empreses tomen midíes reales para evitar los arramaos, cenciellamente porque yos trae cuenta.
“Rescampla que, a pesar del trabayu de concienciación, les alministraciones siguen ensin entender que’l dañu medioambiental ye irreparable y perxudicial pal conxuntu la población y altamente dañible pa tantos otros sectores económicos que dependen d’una redolada renaturalizao. Siguimos ensin entender, por tanto, a quién beneficien estes baxeces” declararon dende la Coordinadora Ecoloxista, que lleven años reclamando que s’adopten les midíes pa solucionar el problema de los arramaos y llamando l’atención sobre la precariedá o inesistencia de depuradores o sistemes de tratamientos d’arramaos nestes instalaciones, col inevitable impactu que xeneren na redolada de la cuenca onde terminen.
Susana Sela
This work is licensed under a Creative Commons Attribution 4.0 International License.
