Ixuxú Cultura celebra’l so aniversariu na sala Tizón axuntando a dos de los grupos más representativos del xéneru

La promotora de conciertos especializada en música en llingües minorizaes, Ixuxú Cultura, cumple un añu d’actividá dende que retomó esti proyectu que naz de les cenices d’Ixuxú Asturies-Euskal Herria
Elkartea (2013-2018). Pa celebralo, organiza un conciertu d’aniversariu con destacaos grupos de la música vasca y asturiana: Zea Mays y Skontra. L’eventu va ser el sábadu 24 de febreru na sala Tizón de
Xixón, con un preciu d’entrada anticipada online a 12 € y na puerte de 15 €.
Zea Mays ye una de les bandes más importantes del rock n’euskera. Tienen la capacidá d’enganchar pasín a pasu a too tipu d’oyíos. A vegaes pop, otres tastiando’l stoner, tamién xugueteando cola
electrónica… Un estilu diversu al que se-y queda curtiu la etiqueta de rock. Inclasificables y, sobre manera, emocionantes en directo.
Tienen tocao per Europa, Xapón y esti sábadu toquen en Xixón per tercer vegada pa dar aniciu a una xira que los va llevar per festivales d’Estaos Xuníos y Méxicu. Skontra ye ún de los grupos más veteranos de la escena de rock n’asturianu, con más de venti años de trayectoria, una montonera d’himnos compuestos y un directu pa nun aparar de facer pogu col so punk-folk. Too ello calteniendo nestes dos décades la so filosofía d’autoxestión y el so compromisu cola xusticia social. Como Zea Mays ye’l primer grupu qu’Ixuxú traxo a tocar a Asturies (en payares de 2013) y Skontra a quien más veces llevó a tocar al País Vascu, la promotora axúntalos nesta nueche de rock y diversidá llingüística.

Alberto Rodríguez

This work is licensed under a Creative Commons Attribution 4.0 International License.