Xixón Gourmet incorpora ocho restoranes nuevos a la so ufierta, que va tar dividida en categoríes con precios estremaos; cuatro establecimientos nuevos súmense al Xixón Llambión y la Ruta de la Sidra reinvéntase ya inclúi bonos de sidra más ración de preba.
Que en Xixón cómese bien ye un fechu probáu. Nos años caberos, la ciudá asturiana tien vivío una revolución de la so ufierta gastronómica con iniciatives nueves de cocineros y reposteros que se sumen a los establecimientos yá afitaos. Esti fechu llevó a Visita Xixón a anovar los sos productos gastronómicos: Xixón Gourmet, Xixón Llambión y Ruta de la Sidra.
Con esta actualización de los productos pretenden potenciar la bayura cultural y culinaria de Xixón, pero tamién cuenten con que tendrá un impactu económicu positivu al fomentar el turismu gastronómicu de calidá y apoyar a los productores llocales.
El productu qu’inclúi más cambeos ya’l Xixón Gourmet, qu’ufre menús en trece de los restoranes más destacaos de la ciudá. Ocho d’ellos son incorporaciones nueves. El bonu Xixón Gourmet, que pue mercase en www.reservagijon.es o n’Infoxixón pa esfrutar o pa regalar, divídese agora en cuatro categoríes: Xixón Gourmet con estrella, pa restoranes gallardonaos con estrella Michelín; Xixón Gourmet preba, pa restoranes con una gastronomía de nivel eleváu y con un menú de dellos platos que ye la meyor forma de conocer la so cocina; Xixón Gourmet productu, pa saborguiar productos de temporada (pescaos, arroces…) y materies primes de calidá.; y Xixón Gourmet actual, pa restoranes d’estética y cocina actual, que respeten los ingredientes, pero aporten téunica, presentaciones curioses y un toque creativu.
Otru de los productos que s’anueva ye Xixón Llambión, qu’incorpora cuatro establecimientos nuevos a la so ufierta. Xixón Llambión ye una ruta gastronómica per delles confiteríes y xeladeríes de Xixón, que permite prebar hasta 15 especialidaes, emblemes d’otros tantos establecimientos de la ciudá. Los bonos, de 5 o 10 prebes, puen mercase en www.reservagijon.es o en Infoxixón a un preciu de 9 y 15€, respeutivamente.
Por supuestu, la sidre y la cocina más tradicional nun podía faltar nesta ufierta gastronómica de Xixón. Visita Xixón ufre bonos que se puen cambear por una botella de sidre, seleición o DOP, más una ración de preba nes sidreríes más emblemátiques de la ciudá. El preciu’l bonu ye de 15€ y pue mercase en www.reservagijon.es o nos puntos d’información turística Infoxixón.
Susana Sela
This work is licensed under a Creative Commons Attribution 4.0 International License.
