El proyectu vien d’inagurar la so páxina web arlas.net, asina como les redes sociales pa da-y espardimientu. Si recibe la rempuesta que la hestoria de la represión llingüistica merez, cuerre pelligru de saturase rapidamente

Coincidiendo col Día de la Llingua Materna asoleyóse’l proyectu del Archivu de la Represión Llingüística del asturianu [ARLAS], un proyectu dirixíu pol doctor y miembru de l’Academia de la Llingua Asturiana, Inaciu Galán, que s’especializó nel estudiu de la represión llingüística n’Asturies cola so tesis sobre la sitiuación del idioma nel franquismu, asina como con dellos documentales y otros trabayos académicos sobre la cuestión. Tres del trabayu audiovisual ta Cuatro Gotes Producciones y l’equipu técnicu que coordina Lluis Fanjul, que trabayó tamién nos documentales citaos. El proyectu cunta cola collaboración d’Iniciativa pol Asturianu.

Con esti Archivu, fundamentalmente audiovisual, lo que se quier ye sacar a la lluz como mientres años, l’asturianu foi tapecíu y los sos falantes discriminaos poles instituciones, sobre manera, na dómina franquista, pero tamién en democracia, yá qu’estos casos siguen dándose anguaño en numberosos ámbitos.

Inaciu Galán documentó delles d’estes situaciones na realización de la so tesis sobre l’asturianu nel franquismu y d’ello surdió primero’l documental “No se dice ye, se dice es”. Tres les grabaciones feches nesti proyectu audiovisual vióse que la cantidá de casos yera mui grande. Poro, decidió dar un pasu más p’allá y crear l’ Archivu de la Represión Llingüística del asturianu [ARLAS].

L’Archivu de la Represión Llingüística del asturianu [ARLAS] ye un proyectu encontáu na investigación académica y col envís de mirar pola rigorosidá del so conteníu y la correcta interpretación de los datos conformóse un comité científicu del que formen parte por persones del ámbitu académicu y de distintes procedencies. D’esta manera, amás del propiu Inaciu Galán, formen parte del comité destacaos investigadores y profesores como la doctora Claudia Elena Menéndez (Universidá d’Uviéu), doctora Covadonga Lamar Prieto (University of California-Riverside), doctor Avelino Corral Esteban (Universidá Autónoma de Madrid), doctora Isabel Álvarez Sancho (Oklahoma State University), la investigadora Miriam Villazón Valbuena (University of California-Riverside) y el periodista y presidente d’Iniciativa pol Asturianu Iván Llera Huerta.

L’ARLAS quier ser un espaciu vivu, que creza col pasu del tiempu y vaya incorporando materiales de toles dómines, polo qu’anima a les persones que vivieren situaciones de discriminación a apurrir los sos testimonios a hola@arlas.net.

Susana Sela

This work is licensed under a Creative Commons Attribution 4.0 International License.