Los docentes denuncien les xabaces condiciones de la “Carrera profesional” que fae que, amás de cobrar menos que’l restu l’estáu demientres dellos años de la so vida llaboral, tengan que pasar por valoraciones arbitraries y nun enfermar nunca pa conseguir que se yos paguen los pluses

Un profesor asturianu de secundaria qu’entama a trabayar cobra 2537,31 € brutos al mes, cuasi 200€ mensuales menos que la media l’estáu y bien lloñe de lo que cobra un vecín Cántabru, onde un profesor de secundaria entama la so vida llaboral con un sueldu de 2 813,76 € brutos. Un mayestru de primaria recién ingresáu na profesión cobra 2234,41 € brutos al mes, 153,98 € menos al mes que la media del estáu. 

Esa descomanada diferencia ye decisión del gobiernu asturianu, que paga un complementu específicu más baxu que nel restu territorios  (16,26 €/mes menos nel casu los mayestros y cuasi 23 €/mes menos en secundaria) y la segunda ye nun cuntar con complementu autonómicu, cuandu hai comunidaes que cobren nesi conceptu 400, 500…. Y fasta más de 1 000 € nel casu’l País Vascu. El resultáu ye que los docentes d’Asturies son de fechu los que menos cobren nos sos primeros años de trabayu, ya que los únicos que tienen un sueldu base inferior – Ceuta, Melilla, ya Illes Balerars- cuenten con un complementu adicional por cuestiones xeográfiques. 

¿Qué pasa cuando pasen los años (5 polo menos) y pueden entamar a sumar pluses que vaigan igualando la so situación? El plan propuestu pol gobiernu autonómicu, cola complicidá d’ANPE y UGT, consiste nun plan d’evaluación al que bautizaron coloquialmente como “carrera profesional”. SUATEA denuncia que pa cobralo ye preciso sometese a una riestra de condiciones llaborales indignes, como que cualisquier baxa penalice o depender de la opinión del equipu directivu pa cobrar, quedando indefensos en casu d’acosu por parte del mesmu. “La evaluación docente aseméyase a un sistema de premios y castigos orientáu a caltenenos dóciles y sumisos, a carecer durante unos cuantos años pero ser felices porque tamos esperando la recompensa. Tómenmos pol perru de Pávlov. Dende SUATEA opusímonos siempres a esti sistema de condicionamientu operante, inxustu. Defendimos y seguiremos defendiendo un complementu salarial llinial, pa tol profesoráu, que se cobre ensin denguna contrapartía, nin  motivación qu’igualanos a los compañeros que n’otros llaos tan exerciendo esactamente’l mesmu trabayu que nosotros, pero cobrando más”.

Nel Dos Santos

This work is licensed under a Creative Commons Attribution 4.0 International License.