Los carriles pa les bicis tan pensaos como una forma d’afalar la movilidá caltenible y facer les ciudaes más amigables pa col mediu ambiente. Si, como fixeron na Pola Siero, la so construcción implica’l desaniciu de decenes d’árboles, esti oxetivu piérdeses
Por cuenta de la costrucción d’un nuevu tramu de carril bici financiáu con fondos europeos al traviés del Plan de Recuperación, Tresformamientu y Resiliencia, estropiáronse tolos árboles que se llantaren nos postreros 10 años na Cai Alcalde Parrondo. Son 44 árboles afectaos: 10 pládanos colloraos, 24 abedurios, 5 perales y 5 pumares, que tienen bien poques posibilidaes de sobrevivir tras la corte de los sos raigaños.
“Construyir un carril bici esaniciando o estropiando zones verdes y árboles, en cuenta de espaciu pal coche, ye una xirigonza pa un cambéu necesariu camín de la movilidá caltenible. Los árboles desempeñen un papel importante xenerando solombra y un aumentu de la biodiversidá urbana, apurriendo plantes y animales con un hábitat, alimentos y protección favorables” declaren dende la Coordinadora Ecoloxista d’Asturies, que yá presentó una quexa al respeutu a la Comisión Europea.
Los árboles grandes son escelentes filtros pa contaminantes urbanos y partícules fines. Absuerben los gases contaminantes (como’l monósidu de carbonu, los ósidos de nitróxenu, l’ozonu y los ósidos sulfurosos) y peneren partícules fines como’l polvu, la suciedá o’l fumu del aire atrapándolos nes fueyes y la corteza.
“Ye necesario más carriles bici y más zones piatonales, pero non a cuenta de les poques zones verdes que tienen les nueses ciudaes” aporfien dende la CEA.
Llucía F. Marqués
This work is licensed under a Creative Commons Attribution 4.0 International License.
