Cerca de doscientes persones siguieron con atención les pallabres del palestín Majel Dibsi que, nuna charra enllena d’información y sentimientu, non solo repasó la situación del pueblu palestín sinón que dio una vuelta al escenariu mundial, rescamplando la manipulación xeneralizada y la falta de política d’esteriores d’una Europa títere

La sala de l’antigua Escuela de Comerciu quedó piqueña y la xente entamó a llegar media hora anantes de la marcada comu entamu de la charra, tantu yera’l pruyimientu de sentir les pallabres de Majel Dibsi, non solo un testimoniu en primer persona de lo que ta careciendo’l Pueblu Palestín, sinón una de les persones coles idegues más clares y meyor informaes non solo nesti conflicutu sinón no que cinca a política internacional.

Con desplicaciones clares y contundentes foi guiando a los presentes pela hestoria -recién y non tanto- de Palestina, esclariando conceutos, equivocaos a costafecha pa ser remanaos pola prensa y los estaos occidentales y desgranando argumentos a favor de la causa palestina a lo llargo d’hora y media que pasó volao. 

Darréu los presentes pudieron facer entrugues que Majed retrucó de manera clara y documentada.

Previamente a la intervención del xurista y periodista palestín, Llucía Fernández en nome d’Andecha Astur amosó la disposición del pueblu asturianu pa continuar cola movilización y la presión social comu principal aportación que se-y pue faer al Pueblu Palestín y a la so llibertá, “tenemos que facelo como asturianes/os que tamién lluchamos pola libertá d’Asturies, y qu’aspiramos a un mundiu xustu formáu por pueblos llibres y soberanos”. Tamién intervio Adrián Tuero, d’Asturies Insumisa, quien amás de facer un repasu al llabor revindicativu que se fae dende Asturies pol Pueblu Palestín, apuntó con contundencia contra la hipocresía del gobiernu español. 

P’aquellos que nun pudieren asistir, tará disponible bien ceo un podcast cola intervención de Majed Dibsi que vos fadremos llegar a los nuesos llectores. 

Llucía F. Marqués

This work is licensed under a Creative Commons Attribution 4.0 International License.