El barriu más ricu ya’l más probe d’Asturies tan na mesma ciodá, con una distancia de cerca 2.200 euros al mes pente los ingresos mensuales d’unos y d’otros pero con un coste de vida bien asemeyáu. Seique un asturianu ricu gana cuatro vegaes lo qu’un asturianu probe, incluso los asturianos más ricos ganen cuatro vegaes menos que los habitantes de los barrios más ricos d’España
Los caberos datos recoyíos poles estadístiques del INE apunten a La Correoria comu’l más probe de los barrios asturianos, onde la media de la población algama con esfuerciu unos ingresos medios de 8.750 € por llar, ello ye, menos de 730 euros pa pasar el mes nuna fastera onde l’alquiler d’un pisu d’una sola habitación nun baxa de los 400 ya’l de tres habitaciones requier prauticamente’l salariu enteru (los datos apunten a un preciu d’8’7 € por metru cuadráu el caberu trimestre). El barriu de Pénjamo, en Llangréu (10.850 € de renta media) , y Santullano en Mieres (9.450 € añales) ronden cifres asemeyaes.
Contradictoriamente, Uviéu ye’l conceyu asturianu con meyor calidá de vida. Tamién n’Uviéu alcontramos el barriu más ricu, con una renta media añal de 35.000 euros, ello ye, cuatro vegaes más que na Correoria. Concretamente, na redolada de les cais Leopoldo Calvo-Sotelo y Santa Teresa. Allí el preciu por metru cuadráu de vivienda asciende a los 9’3 € por metru cuadráu, una diferencia bien escasa en relación a los precios de la zona más probe.
Fuera del ámbetu urbanu, Somiéu ye’l conceyu más probe d’Asturies, con una renta media de 17.737 euros añales y Castrillón el más ricu, con una media de 31,180.
En cualisquier casu, la renta de la zona más rica d’Asturies palidez frente a la renta media del barriu de Salamanca, en Madrid, qu’asciende a los 102.000 euros añales o la Moraleja, con 134.000, más de lo que tienen pa vivir quince families de la Corredoria o cuatro de les más riques d’Asturies.
Alberto Rodríguez
This work is licensed under a Creative Commons Attribution 4.0 International License.
