Arrinca la obra para retirar 1 kilómetru de torres d’alta tensión na redolada del faru de Valdés “Un llugar que ca vegada atrai más turistes” porque fadien pa les semeyes; mentantu, los cables siguen pasando perriba  pueblos xenerando graves problemes de salú ensin qu’eso esmoleza, demostrando una vegada más onde tán les prioridaes nesti país

Los estudios suxeren que la esposición a los altos niveles de campos lletromagnéticos que xeneren les torres ya instalaciones llétriques pue tar acomuñada con un mayor riesgu de ciertos tipos de cáncanos como la lleucemia infantil, altos niveles d’interrupciones involuntaries d’embaranzos, malformaciones nes nacencies y otros problemes de salú, como dolores de tiesta, fatiga y problemes de suañu. Por ello’l soterramientu de cables, sobremanera al so pasu percima de poblaciones, ye una demanda n’Asturies dende los años noventa.

Per entós, dende Andecha Astur y tres un estudiu de la contaminación lletro-magnética xenerada peles llinies d’alta tensión nel conceyu Llangréu, con resultaos de fasta 30 vegaes la llende de 100 nanotesles de magar del que se considera nocivu pa la salú humana, rializarense diversos aconceyamientos colos vecinos afectaos per estes llinies d’alta tensión, solicitándose al Conceyu Llangréu l’aprebación d’un Plan de soterramientu de los tendíos llétricos nel conceyu, plan ignoráu dafechu polos gobernantes del momentu y anteriores.

Poru, el soterramientu de cables ye una bona noticia. Llástima que vaiga facese precisamente onde nun afeuten a la salú de naide, sinón a les semeyes de los turistes. Cuestión de prioridaes. 

Nel Dos Santos

This work is licensed under a Creative Commons Attribution 4.0 International License.