la sala del CMI del Llanu de Xixón acoyó la presentación del documental L’escaezu de -les piedres, documental dirixíu por Omar Tuero, nel qu’afonda na nuesa hestoria recién más tapecía
L’escaezu de les piedres ye un proyectu de la productora Covenant Audiovisuales en collaboración con FAMYR (Federación Asturiana de Memoria y República), entidá que sofitó la so producción y dende onde trabayen p’atender a los supervivientes y a les families de los represaliaos, investigar y sopelexar de forma rigorosa la hestoria de la llucha contra’l franquismu.
Omar Tuero narra nel so documental la esistencia de los campos de concentración que se llevantaron n’Asturies específicamente pa presos políticos y qu’una vegada rematada la guerra continuaron furrulando comu campos de prisioneros gubernativos p’agospiar a los “desafectos” del réxime.
Calcúlase que n’Asturies hubo siquier quince campos de concentración, siempres alloñaos de los núcleos de población, auténticos llugares de tortura y esterminiu, non yá polos asesinatos a punta de bala sinón por toles muertes frutu de les tortures, fame, fríu, enfermedaes…
En 1937, Franco plantégase aprovechar y rentabilizar a estos homes y muyeres equí recluyíos, estremándolos en “reaprovechables, dudosos y desafectos”, siendo utilizaos los válidos pa ello comu man d’obra en carreteres, xeres del campu ya inclusive n’empreses privaes. Eses y otres munches cuestiones tocar nel documental, sacando a la lluz una tema tapecíu mientres décades.
Distintos historiadores y espertos apurren dando datos y detalles a lo llargo de tol documental: Pablo Alcántara desplica’l sistema d’impunidá establecíu poles autoridaes franquistes; Fernando García Rodríguez describe la situación n’Arnao; Cristian Rangel fala del campu de concentración de Grao; Pablo Martínez Corrolada de la Vidrera d’Avilés; Amaya Caunedo y Mónica García Fernández despliquen la situación de les muyeres recluyíes; Ramón García Piñeiro fala del campu de Candás y Carlos Hernández de Miguel esplica cómo naz la idea d’encadarmar estos campos d’internamientu.
Amás del autor participaron na presentación Rafael Velasco de FAYMR, Begoña Collada, directora de Memoria Democrática del Principáu d’Asturies y María Eugenia Castiellu, fía, nieta y sobrina de prisioneros republicanos del campu de Arnao, Castropol.
Alberto Rodríguez
This work is licensed under a Creative Commons Attribution 4.0 International License.
