David M. Rivas impartirá una Charra-Alderique sobro la Soberanía entendía como conceutu xeneral, nel primer actu públicu del conceyu d’Andecha-suroccidente

El sábadu 30 xineru a les 18 hores na Casa Cultura Teberga, de la mán del economista David M. Rivas Infante, tendrá llugar una interesante charra na que se defenderá la emportancia de la soberanía alimentaria, plantegada comu “el drechu de los pueblos  a definir les sos propies polítiques y estratexes caltenibles de produición, distribuición y consumu d’alimentos”, la soberanía enerxética, en tantu la capacidá d’un país pa controlar los sos propios recursos enerxéticos y satisfacer la so demanda d’enerxía, de forma caltenible, y la relación d’estes dos cola soberanía política, imprescindible pa poder algamar les dos anteriores ensin inxerencies esternes.

Darréu la intervención de Rivas abriráse un alderique colos asistentes col envís d’esclariar conceutos, nel que dende Andecha Astur afalará a los presentes a proponer y estudiar estratexes concretes d’actuación  p’avanzar nestes soberanies.

Esta charra, amás, abre les actividaes del conceyu d’Andecha nel surocidente asturianu, una fastera na que la organización ta garrando puxu y afitando la so cadarma.

Nel Dos Santos

This work is licensed under a Creative Commons Attribution 4.0 International License.