Bonos díes, bona xente.
Alborecemos col cielu nubosu y precipitaciones febles ya disperses con unes temperatures que tan alrodiu de los 5ºC, rexistrándose nel puirtu Payares -2,4ºC onde nieva llixeramente.
Güei vamos tener nubosidá pero sin malpenes precipitaciones que dirán retirándose percompletu a lu llargu del día con unes temperatures que van camudar poco, calteniéndose un día ivernal ya fríu.
Mañana llunes alboreceremos con nubes ya claros o abancios y xelando nel interior asturianu y cordelera, aumentará la nubosidá alta durante’l día y l’ambiente seguirá siendo mui ivernal con un descensu llixeru de les temperatures, a pesar de que nun s’esperen precipitaciones.
El martes les xelaes sedrán más estensas ya intenses y nel cielu predominarán los claros sobre les nubes durante’l riscar, aumentando la nubosidá estratificada na metá norte d’Asturies pela mañana, mentandu na cordelara vamos tener nubes ya claros o abancios gran parte del día. Les temperatures en moderáu descensu y l’aire del nordés con dalguna racha moderada nel llitoral y sele nel interior.
El miércoles tovía con muncha incertidumbre tendremos precipitaciones ente febles ya moderaes, en principiu más probables a partir del mediudía que puen ser de nieve perriba de los 300-400m con un descensu moderáu de les temperatures másimes, mentantu les mínimes camudarán poco o subirán llixeramente por mor de les nubes. L’aire sedrá mui sele de componente norte polo que nos valles del interior, si aprieta la precipitación, la cota de nieve pue baxar hasta lo fonderu’l valle, nevando perdebaxo de los 300m.
Durante’l riscar del xueves seguiremos baxo esta situación con precipitaciones ente febles ya moderaes y cola cota de nieve mui baxa pudiendo surdir puntualmente ente los 200-300m. Yá durante la mañana la nieve tenderá a retirase a les montañes y les precipitaciones seguirán presentes pero con tendencia a dir remitiendo. L’ambiente volverá a ser mui fríu con másimes que malpenes superarán los 5-6ºC.
Los siguientes díes sedrán protagonistas les xelaes pero d’eso ya falaremos.
La situación paez que va definiéndose pero entovía hai detalles que se nos escapen pudiendo variar sensiblemente la predición.
Que paséis un bon domingu collacies ya collacios.
This work is licensed under a Creative Commons Attribution 4.0 International License.
