Andecha Astur despidió’l 2023 con un sentíu homenaxe a Andrés Solar, el poeta que meyor supo pescanciar el camín a siguir pol pueblu asturianu.
Na selmana anterior, por iniciativa d’Andecha, decenes de persones subieren versos del autor a les redes sociales.
La cita foi al pie del cimenteriu nel que reposen los restos del escritor, activista políticu y axitaor cultural, na parroquia de Deva que lu vio xorrecer. La ceremonia tuvo llugar al pie de la placa qu’Andecha Astur punxo va décades na so memoria y entamó cola música de gaita, dando pasu a la llectura d’un poema por parte del que fore el so collaciu y compañeru, Antón Gonzales, autor tamién del retratu d’Andrés que presidió l’actu.
La gaita tornó a sonar entós, acompangando’l solemne desfile baxo les banderes, nel que ca persona posó una flor en so honor, dando pasu darréu a la intervención de Llucía Fernández, qu’interpretó en clave actual la poesía “Falando contigo”, na qu’Andrés se dirixe direutamente a caún de los asturianos, afalándolos a siguir alantre asoleyando’l país.
Como davezu, l’actu foi emotivu asgaya, cola presencia d’antiguos collacios del Ensame Nacionalista Astur, organización de la que foi fundaor, y tamién de muncha xente que, ensin tener la suerte de conocelu en persona, respeten y almiren el llegáu d’Andrés Solar pola so obra, tantu nel ámbetu lliterariu comu políticu.
Falando Contigo
Toi buscando la manera de dicite
qu’hai milenta razones que se llamen como tu.
Y qu’esperen por ti, qu’esperen por ti.
A vegaes camiento cansáu
que nin siquiera sabrán que tuviemos equí,
asoleyando un país que cayó una nueche a la mar
, y na mar y na nueche lu quixeren dexar.
Nin siquiera sabrán que tuviemos equí
cola voz y les manes falando d’amor,
alando de ti, falando de ti.
Pero ye igual,
hai que facer del argayu un fueu,
del vientu un hermanu qu’esparda’l calor,
qu’esparda’l calor.
Hai que siguir asina y equí.
Hai que siguir,
hai que siguir
This work is licensed under a Creative Commons Attribution 4.0 International License.
