La plataforma Stop Violencies, qu’acomuña a cerca d’una docena d’entidaes que denuncien y reclamen midies pa finar coles violencies que les muyeres carecen pol fechu de selo, vien d’espublizar un vidiu nel que pon l’acentu na collaboración de los homes pa finar cola violencia machista
“Si yes un maltrataor, nun yes de los nuestros”, esa ye la frase que repiten 25 homes pa marcar les distancies colos maltrataores. Trátase d’homes d’estremaes edaes, reconocios por destacar nel so ámbetu: pintores, escritores, profesores, mélicos, músicos, esportistes, empresarios, artesanos… con un mensaxe común que llanzar al restu d’homes. Apartar al violentu, aisllalu, señalalu y dexalu solu ye una estratexa efeutiva en cualisquier casu d’acosu, bulling o abusu; nun ye estremao pa los violentos que, amparaos nuna sociedá que lleva sieglos siguiéndoyos el xuegu, utilicen la fuercia -física o verbal- contra les muyeres. D’ehí la emportancia de finar con esa complicidá y que los homes presllen files contra los maltrataores, dexando claro que tan solos.
D’esta manera, dende Stop Violencies incluin tamién a los homes de manera esplicita na llucha contra’l machismu, afitando qu’esta ye una llucha de tola sociedá por meyorar y ser más xusta, non solo de les muyeres, y que’l papel masculín na so erradicación ye perimportante.
Na Plataforma Stop Violencies tan les organizaciones Andecha Ástur, Anticapitalistes, Dar de mamar, Asociación de Pensionistes de Xixón, Feminismu en Llucha del CSI, la plataforma del serviciu d’ayuda a domiciliu -SAD-, Podemos y Verdes-Equo.
Nel Dos Santos
This work is licensed under a Creative Commons Attribution 4.0 International License.
